मराठा समाजान सामाजीक बांधिलकी तिगोवन मुखार वच्चेंः मुख्यमंत्री
भांगरभूंय | प्रतिनिधी
पर्वरीत समाज संकुलाचे उक्तावण
पणजीः मराठा समाजान समाजीक बांधिलकी तिगोवन दवरची आनी हेर समाजांक घेवन मुखार वच्चें अशें मुख्यमंत्री डॉ. प्रमोद सावंत हांणी सांगलें. शेनवारा पर्वरी अखिल गोमंतक क्षत्रिय मराठा समुदायाच्या संकुलाच्या उक्तावण सुवाळ्यांत ते उलयताले. ह्या वेळार समाज कल्याण मंत्री सुभाष फळदेसाय, आमदार उल्हास तुयेकार, डॉ. चंद्रकांत शेट्ये, राजेश फळदेसाय, संस्थेचे अध्यक्ष सुहास फळदेसाय आनी हेर हाजीर आशिल्लें.
छत्रपती शिवाजी महाराज आनी संभाजी महाराज हांकां लागून गोंयांत पुर्तुगेजां कडल्यान जावपी धर्मांतर आनी देवळां नश्ट करपाचीं प्रकरणां उणीं जालीं. गोंयचे उदरगतींत मराठा समाजान व्हड योगदान दिलां. ह्यान फुडेंय अशेंच योगदान दिवप ही जापसालदारकी समाजाच्या सध्याच्या फुडारपणाची आसा. स्पर्धात्मक परिक्षे खातीर गरजेवंत तरणाट्यांक मार्गदर्शन करपा खातीर समाजान घेतिल्ल्या निर्णयाक आमी येवकार दितात. गोंय सयत राष्ट्रीय पांवड्या वयल्या स्पर्धात्मक परिक्षे खातीर ह्या केंद्रांत मार्गदर्शन दिवचें अशें डॉ. सावंत हांणी सांगलें.
तांणी फुडें म्हणलें, नव्यान बांदिल्ल्या संकुलाक लागून समाजाक नवी उर्जा, प्रेरणा आनी दिका मेळटली. संकुलांतल्या वेगवेगळ्या हॉलांतल्यान सोसायटीक येणावळ मेळटली. ही येणावळ समाजांतल्या गरजेवंत लोकांक वापरपाक जाय. हाका लागून बायलां आनी तरणाटे सशक्त जातले अशी अपेक्षा आसा. समाजाचें काम गरजेवंत लोकांक आदार दिवप, सांस्कृतीक दायज सांबाळप आनी धर्मीक परंपरा मुखार व्हरप अशें आसचें हाची खात्री समाजान करची.
मंत्री सुभाष फळदेसाय हांणी मार्गदर्शन करतना सांगलें, समाजान कोणा मुखार लोटांगन घालीनासतना स्वताचे कामगिरीच्या बळग्यान, बुद्धीच्या बळग्यार मुखार वच्चें. छत्रपती शिवाजी महाराजान सगळ्यांक एकठांय हाडून स्वराज्याची थापणूक केल्ली. तेच प्रमाण आयज आमकां सगळ्यांक एकठांय हाडून मुखार वच्चें पडटलें. ह्या वेळार डॉ. गावकार हांकां ‘जीवन गौरव’ पुरस्कार दिवन भोवमान केलो.
जातिनिहाय सर्वेक्षण करतले
राज्यांत मराठा समाजाची नेमकी संख्या जाणून घेवपा खातीर ‘जातिनिहाय सर्वेक्षण’ करतले अशें संघटनेचे अध्यक्ष सुहास फळदेसाय हांणी सांगलें. सध्या केपें तालुक्यांत हो प्रकल्प चालू आसा आनी रोखडोच हेर तालुक्यांनीय अशेंच सर्वेक्षण जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
