भांगरभूंय | प्रतिनिधी
पणजीः राष्ट्रपती द्रौपदी मुर्मू 27 आनी 28 डिसेंबराक गोंयांक भेट दितली. हे फाटभूंयेर गोंय येरादारी पुलीस विभागान ट्रॅफिक ॲडव्हायझरी जाहीर केल्या. हाका लागून दाबोळे विमानतळा सावन दोना पावला मेरेनच्या मार्गाचेर सगल्या प्रकारच्या वाहनां खातीर थारायिल्ल्या काळा खातीर येरादारी बंद आसतली. फकत आपत्कालीन वाहनांकच यो-वच करपाक मेळटलें.
येरादारी पुलिसांच्या म्हणण्या प्रमाण, राष्ट्रपती 27 डिसेंबराच्या सांजवेळार दाबोळे विमानतळा वयल्यान दोना पावला मेरेन वतली आनी 28 डिसेंबराच्या सकाळीं दाबोळे विमानतळार परतून वतली. ह्या प्रवासा वेळार चिखली, कुठ्ठाळी, नवो जुआरी पूल आनी बांबोळे मार्गान दाबोळे ते दोना पावला रस्तो 27 डिसेंबराक सांजवेळा 6:00 ते रातीं 8:00 मेरेन बंद आसतलो जाल्यार 28 डिसेंबराक सकाळीं 7:30 ते 9:30 मेरेन बंद आसतलो. पूण ह्या काळांत एम्ब्युलन्स आनी हेर आपत्कालीन सेवा वाहनांक ह्या मार्गाचेर वचपाक मेकळीक येतली.
प्रवाशांक असुविधा जावची न्हय हे खातीर प्रशासनान कांय पर्यायी वेवस्था केल्या. वेर्णाच्या बिर्ला क्रॉस जंक्शना वयल्यान दाबोळे विमानतळा मेरेन वचपा खातीर प्रवाशांक राष्ट्रीय म्हामार्ग 566 चो वापर करपाक सांगलां. तशेंच व्हीव्हीआयपी मार्गाचेर वाहनां उबीं करचीं न्हय अशी सुचोवणी दिल्या आनी वेगवेगळ्या सुवातेर येरादारी नियंत्रीत करून वळयतले. सुरक्षीत येरादारी खातीर पुलीस दळाक पुराय सहकार्य करचे असो उलो अधीक्षक (येरादारी) कार्यालयान केलां.
मजगतीं, राष्ट्रपती द्रौपदी मुर्मू 27 ते 30 डिसेंबर मेरेन गोंय, कर्नाटक आनी झारखंड भोंवडेर आसात. 27 डिसेंबराक राष्ट्रपती गोंयाक भेट दितली. 28 डिसेंबराक कर्नाटकांतल्या कारवारांतल्या पाणबुडी सफारी आनी 29 आनी 30 डिसेंबराक झारखंडांतल्या वेगवेगळ्या सांस्कृतीक कार्यावळींक आनी ‘एनआयटी’ सुवाळ्याक हाजीर रावून संबोधीत करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
