भांगरभूंय | प्रतिनिधी
पणजीः नाताळाच्या सुटयेच्या दिसांनी गोंयच्या दर्यादेगांचेर जावपी गर्दी पळोवन जीवरक्षकांक सादूर रावपाची शिटकावणी दिल्या. जीवरक्षकांनी स जाणांक बुडपा पसून वाटायले. आनी स बेपत्ता भुरग्यांक सोदून काडले. तशेंच जेलीफिशाच्या डंकाच्या दोन केशींचेर लायफगार्डांनी उपचार केले. फातरांच्या दर्यादेगेर निसरुन जखमी जाल्ल्या रशियन पर्यटकाक तांणी वैजकी मजत दिली.
हरमल दर्यादेगेर म्हापशेंच्या 33 वर्सां पिरायेचे बायलेक तळयेंत बुडतना वाटायली. दर्यादेगेर कुटुंबा पसून वेगळी जावन शेणिल्ली सात वर्सां पिरायेचे चलयेक टॉवर कर्मचाऱ्यांनी वाहन गस्त पंगडांच्या मजतीन कुटुंबा कडेन दिली.
मांद्रेंतल्या खोल दर्याच्या उदकांतल्यान हैदराबादच्या दोन 23 वर्सां पिरायेच्या तरणाट्यांक वाटायले. मुंबयच्या दोगांक मोरजे दर्यादेगेर वाटायले.
बागा दर्यादेगेर वेगवेगळ्या वेळार तीन भुरगीं बेपत्ता जाल्लीं. दर्यादेगेर गर्देंत तांकां सोदले आनी तांच्या कुटुंबा कडेन दिले. कळंगुटेच्या दर्यादेगेर कळंबोलीचो तीन वर्सां पिरायेचो भुरगो बेपत्ता जाल्लो. ताका सोदून ताच्या कुटुंबा कडेन दिलो.
कांदोळे दर्यादेगेर पंजाबाचो सात वर्सांचो भुरगो पेंवतना बुडपाक लागलो. रोखडोच ताका लायफगार्डांनी वाटायलो. मुंबयची तीन वर्सां पिरायेची चली बेपत्ता जाल्ली, तिका सोदून तिच्या कुटुंबाच्या हातांत दिली.
जम्मू-काश्मीरांतल्या 20 वर्सां पिरायेच्या पर्यटक आनी पुण्यांतल्या 10 वर्सां पिरायेच्या भुरग्याक बायणा आनी बाणावली दर्यादेगेर जेलीफिशांनी दंश केले उपरांत लायफगार्डांनी तांचेर उपचार केल्यात. पाळोळे दर्यादेगेर 42 वर्सां पिरायेच्या रशियन पर्यटकाक फातराचेर निसरुन दोनूय पांयांक खोल जखम जाल्ली. ताचेर वैजकी उपचार केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
