भांगरभूंय | प्रतिनिधी
नवी दिल्ली, खबरां संस्था ः अमेरिकेंत डोनाल्ड ट्रम्प हांणी जानेवारी 2025त दुसरे खेपे सत्ता हातांत घेतली आनी बेकायदेशीर स्थलांतरीत लोकां आड कारवाय करपाक सुरवात केली. पूण 2025 वर्सा भारतीय नागरिकांक फकत अमेरिकेंतल्यान न्हय तर आखाती देशांतल्यानय बेगोबेग मायदेशाक धाडल्यात.
हे विशीं परराश्ट्र मंत्रालयान राज्यसभेंत सविस्तर आंकडेवारी सादर केल्या. ह्या आंकडेवारी प्रमाण 2025 वर्सा सावदी अरेबियांतल्यान 11 हजारां परस चड भारतीय नागरिकांक देशांतल्यान धांवडावन घाल्ले. संवसारांतल्या 81 देशांतल्यान 24,600 भारतीय नागरिकांक परतून धाडल्यात. हातूंत सगळ्यांत चड परतून आयिल्ले लोक साउदी अरेबियांतल्यान आसात.
सावदी अरेबिया उपरांत अमेरिकेन सगळ्यांत चड 3,800 भारतीय नागरिकांक देशांतल्यान भायर घाल्यात. हातूंत चडशे खाजगी क्षेत्रांतले कर्मचारी आसात. फाटल्या पांच वर्सांच्या आंकड्यांची तुळा केल्यार 2025 वर्सा सगळ्यांत चड भारतीयांक अमेरिकेंतल्यान भायर घाल्ल्याचें दिसता. अमेरिकेंतल्या वॉशिंग्टन डीसी (3,414) आनी ह्युस्टन (234) ह्या वाठारांतल्यान सगळ्यांत चड जाणांक देश सोडपाक लायला.
सावदी अरेबिया आनी अमेरिके उपरांत म्यानमार (1,591), युएई (1,469), बहरीन (734), मलेशिया (1,485), थायलंड (481) आनी कंबोडिया (305) ह्या देशांतल्यान भारतीयांक परतून धाडल्यात. व्हिसा सोंपले उपरांत रावप (ओव्हरस्टे), वैध वर्क परवानो नासतना काम करप, कामगार कायद्यांचे उल्लंघन करप, धनयांकडल्यान पळून वचप आनी दिवाणी वा गुन्यांवकारी प्रकरणांत आस्पाव आसाप ह्या कारणांक लागून देशांतल्यान धांवडावन घालपाचे प्रमाण वाडलां अशें परराश्ट्र मंत्रालयान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
