भांगरभूंय | प्रतिनिधी
राज्यपाल पी. एस. श्रीधरन पिल्लईः राजभवनाचेर दोतोर, वैजकी मळा वयल्या मानेस्तांचो सत्कार
भांगरभूंय । प्रतिनिधी
पणजीः फाटल्या 75 वर्सांत भारतांतली भलायकी सेवा नेटान सुदरल्या. गोंयांतलें हेल्छ कॅर हें भारतांतलें सर्वोत्कृश्टां मदलें एक आसा. गोंयांत बरी भलायकी सेवा मेळटा, हे खातीर शेजार राज्यांतले दुयेंती गोंयांत भलायकी सेवा घेवचे खातीर येतात, अशें राज्यपाल पी. एस. श्रीधरन पिल्लई हांणी सांगलें.
आझादी का अमृत महोत्सवा निमतान राजभवनांत आयोजीत केल्ल्या मणिपाल हॉस्पिटलाचे दोतोर तशेंच भलायकी सेवकांच्या सत्कार सुवाळ्यांत राज्यपाल उलयताले. ह्या वेळार प्रथम महिला रिथा श्रीधरन आनी केरळाचे मुख्य सचीव डॉ. जॉय हाजीर आशिल्ले.
गोंयांतली भलायकी सेवा व्हड प्रमाणांत वाडल्या. आयज आमी लोकां खातीर एक बरी भलायकी सेवा प्रणाली आसात. ती खुबूच आकर्शक केल्या. ताका लागून आमच्या शेजार राज्यांतल्यान व्हड प्रमाणांत गरीब दुयेंती सदांच येतात. गोवा मॅडिकल कॉलेज ही तांची पयली पसंती आसा. गिरेस्त लोकांनी लेगीत सगळ्या भलायकी सेवां उपायां खातीर गोमॅकॉची निवड केल्या. अवयव दाना खातीर फुडें येवपाचो आयज आपूण एक उलो लोकांक मारता. बायलो देणगीदार म्हूण मुखार सरतात, ही कवतुकाची गजाल आसात. पूण फक्त 10 टक्के दादले रक्तदाते आसात. रक्तदाना खातीर खूब जाणांनी मुखार सरचें, अशें राज्यपाल पिल्लई हांणी सांगलें.
गोंयांतल्या भलायकी सेवा मळाक मणिपाल हॉस्पिटलान घटसाण दिल्या, हे खातीर तांचें कवतूक. हालींच्या काळांत गोंयांतल्या मणिपाल हॉस्पिटलान बोन मॅरो प्रत्यारोपण, कॅन्सराचेर उपचार, काळजां आनी रगताच्या शिरांचेर उपचार, तेचवरी किडनी प्रत्यारोपण ही सेवा दिल्या. अशे तरेचे आधुनीक उपचार सुरू केल्ले खातीर राज्यपाल पिल्लई हांणी मणिपाल हॉस्पिटलाचे उपकार मानले.
ज्येश्ठ ऑन्कोसर्जन डॉ. शेखर साळकार हांणी उपकार मानले.
मणिपाला वतीन ‘अमृत फ्लॅग मार्च’
गोंयच्या मणिपाल हॉस्पिटला वतीन हर घर तिरंगा मोहिमेचो एक भाग म्हूण अमृत फ्लॅग मार्च हो आगळो उपक्रम हातांत घेतिल्लो. स्वातंत्र्य दिसाचे आदले सांजेर मणिपाल हॉस्पिटल गोंयचे कर्मचारी, दोतोर आनी कांय दुयेंतींनी भलायकी, नितळ, सुंदर तशेंच समृद्ध भारताचो संदेश दीत हॉस्पिटला सावन 5 किलोमिटर अंतरा मेरेन तिरंगो घेवन रॅली काडली. आझादी का अमृत महोत्सवाचो एक वांटो म्हूण दोनापावलाच्या राजभवनाचेर दरबार हॉलांत हे रॅलीचो समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
