गोंयांत येवपी देशी पर्यटकांचे संख्येंत दुपेटी परस चड वाड

भांगरभूंय | प्रतिनिधी

फाटल्या धा वर्सांतलो रिझर्व्ह बँक ऑफ इंडियाचो अहवाल

पणजी: फाटले कांय म्हयने सोशल मिडिया इन्फ्लुएन्सर गोंयांतले पर्यटक उणें जाल्ल्याचें सांगतात. अशें आसलें तरी फाटल्या धा वर्सांत गोंयांत येवपी देशी पर्यटकांची संख्या सुमार 108 टक्क्यांनी वाडल्या.

2015त गोंयाक 47.6 लाख देशी पर्यटकांनी भेट दिल्ली. 2024त ही संख्या दुपेटीन वाडून 99.4 लाख इतली जाली. रिझर्व्ह बँक ऑफ इंडियान हालींच जारी केल्ल्या एका अहवालांतल्यान ही म्हायती मेळ्ळ्या.

अहवाला प्रमाण 2015 उपरांत 2020 आनी 2021 हो कोवीड काळ सोडून गोंयांत येवपी देशी पर्यटकांची संख्या दर वर्सा वाडतूच आसा. 2016 वर्सा गोंयाक 56.5 लाख, 2017त 69 लाख, 2018त 70.8 लाख जाल्यार 2019त 71.3 लाख देशी पर्यटकांनी भेट दिल्ली. 2020त ही संख्या उणी जावन 32.6 लाख जाल्यार 2021त 33.1 लाख जाल्ली. पूण कोवीड सोंपले उपरांत गोंयांत येवपी देशी पर्यटकां मदीं परतून वाड जायत आशिल्ल्याचें स्पश्ट जालां.

गोंयांत 2022त 70.1 लाख, 2023त 81.8 लाख पर्यटक आयिल्ले. 2024त गोंयांत 99.4 लाख देशी पर्यटक आयिल्ले. ही फाटल्या 14 वर्सांतली सगल्यांत चड संख्या आसा. 2024त उत्तर प्रदेशाक सगल्यांत चड 64.68 कोटी देशी पर्यटकांनी भेट दिल्ली. तामिळनाडू, कर्नाटक, आंध्र प्रदेश, राजस्थान ह्या राज्यांनी भेट दिवपी देशी पर्यटकांची संख्या चड आशिल्ली. जाल्यार ईशान्ये काडल्या राज्यांनी देशी पर्यटक वचपाचें प्रमाण उणें आशिल्लें.

गोंयांत दिसाक 27 हजार पर्यटक

अहवाला प्रमाण 2024 वर्सा गोंयाक 99.4 लाख देशी पर्यटकांनी भेट दिल्ली. हाचोच अर्थ म्हयन्याक सरासरी 8.28 लाख जाल्यार दिसाक सरासरी 27 हजार 232 देशी पर्यटक गोंयांत आयिल्ले.