भांगरभूंय | प्रतिनिधी
दंडाधिकाऱ्यांकडल्यान चवकशीचो अहवाल सरकाराक सादर
पणजीः बर्च बाय रोमियो लेन उजो प्रकरणांत चवकशी समितीन नेम आनी कायद्यां कडेन दुर्लक्ष करून वेगवेगळे परवाने दिवपी खात्यांक लक्ष्य केलां. हाका लागून निलंबीत केल्ले तेन्नाचे पंचायत संचालक आनी तेन्नाचे पंचायत सचीव आनीकय संकश्टात सांपडल्यात. खात्यांनी नेमा प्रमाण पयलीं चवकशी करून कारवाय केल्ली जाल्यार बर्च बाय रोमियो लेन क्लबाचें काम पयलींच बंद जाता आशिल्लें असो अहवालांत निश्कर्श काडला. हो अहवाल सरकारान अधिकृतपणान जाहीर करूंक नासलो तरी सुत्रां कडल्यान ही म्हायती मेळ्ळ्या.
हडफडेंतल्या बर्च बाय रोमियो लेन क्लबांत 6 डिसेंबराचे रातीं उजो लागलो आनी 25 जाणांक मरण आयलें. मरण आयिल्ल्या मदीं क्लबाचे कर्मचारी आनी पर्यटकांचो आस्पाव आशिल्लो. हे घडणुके उपरांत सरकारान तेन्नाचे पंचायत संचालक सिद्धी हळर्णकार, तेन्नाची प्रदुशण नियंत्रण मंडळाची वांगडी सचीव शमिला मोंतेरो आनी तेन्नाचे हडफडें पंचायतीचे सचीव रघुवीर बागकार हांकां निलंबीत केले. हाचे उपरांत 8 डिसेंबराक सरकारान चवकशी करपा खातीर उत्तर गोंय जिल्होधिकारी अंकित यादव हांच्या अध्यक्षते खाला एक समिती स्थापन केली.
दक्षीण गोंय पुलीस अधीक्षक टिकमसिंग वर्मा, फोरेन्सीक सायन्सचे संचालक आशुतोष आपटो आनी उजो पालोवपी सेवा संचालनालयाचे उपसंचालक राजेंद्र हळदणकार हे समितीचे हेर वांगडी आसात. समितीन बर्च बाय रोमियो लेन क्लबाची पळोवणी केली. सिद्धी हळर्णकार, शमिला मोंतेरो, जमनीचो धनी प्रदीप घाडी आमोणकार आनी हेरांचें जबाब नोंद केले. दस्तावेज आनी परवाने तपासले उपरांत समितीन अहवाल सादर केला.
अहवाल सादर करपा खातीर समितीक पयलीं सात दिसांची मुजत दिल्ली. चवकशी पुराय जावंक नाशिल्ल्यान ही मुजत वाडयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
