भांगरभूंय | प्रतिनिधी
दोनूय जिल्ह्यां खातीर तंत्रीक समितीची अधिसुचोवणी
भांगरभूंय । प्रतिनिधी
पणजी : पॅराग्लायडिंग तशेंच हवेंतले खेळां प्रकार (एरो स्पोर्टस) चडान चड सुरक्षीत जावचे म्हूण यंत्रणे सयत उपकरणांची नेमान तपासणी जातली. यंत्रणे सयत उपकरणांची तपासणी करपा खातीर सरकारान उत्तर गोंय आनी दक्षीण गोंयां खातीर स्वतंत्र समिती स्थापन केल्या. ही समिती उपकरणांची तपासणी करपा सयत उपकरणां तशेंच यंत्रणेचे प्रमाणीकरण करतली.
पॅराग्लायडिंग करतना अपघात जावन जीवितहानी लेगीत जाल्ली आसा. हे फांटभुयेर सरकारान एरो स्पोर्ट्सा खातीरचे नेम खर करतना विम्याची लेगीत तजवीज केल्या. आता एरो स्पोर्टसच्या उपकरण वा यंत्रणेच्या तपासणे खातीर समित्यो स्थापन केल्या.
उत्तर गोंयची समिती अशी: अध्यक्ष – पर्यटन संचालक, उपाध्यक्ष – उपसंचालक (उत्तर), वांगडी सचीव – साहाय्यक संचालक (उत्तर). उत्तर गोंय जिल्होधिकारी प्रतिनिधी, उत्तर गोंय पुलीस अधीक्षक प्रतिनिधी, नागरी विमान येरादारी खात्याचो प्रतिनिधी, मुखेल वैजकी अधिकारी वा प्रतिनिधी, एरो क्लब ऑफ इंडियाचो प्रतिनिधी, पर्यटन कार्यालय साहाय्यक (उत्तर) हे समितीचे हेर वांगडी आसात.
दक्षीण गोंयची समिती अशी: अध्यक्ष – पर्यटन संचालक, उपाध्यक्ष – उपसंचालक (दक्षीण), वांगडी सचीव – साहाय्यक संचालक (दक्षीण). दक्षीण गोंय जिल्होधिकारी प्रतिनिधी, दक्षीण गोंय पुलीस अधीक्षक प्रतिनिधी, नागरी विमान येरादारी खात्याचो प्रतिनिधी, मुखेल वैजकी अधिकारी वा प्रतिनिधी, एरो क्लब ऑफ इंडियाचो प्रतिनिधी, पर्यटन कार्यालय साहाय्यक (दक्षीण) हे समितीचे हेर वांगडी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
