भांगरभूंय | प्रतिनिधी
मडगांवः फातोड्डेंचो मिंगेल मिरांडा (62) आनी ताची सासूमाय कॅटारीना पिंटो (85) हांचो 2021 त खून जाल्लो. ह्या प्रकरणांत दक्षीण गोंय जिल्लो सत्र न्यायालयान दुबावीत रविनकुमार श्यामकुमार सडा (22, बिहार) आनी आकाश अजयकुमार घोष (24, झारखंड) हांकां खुनाच्या आरोपा खाला जल्मभराची बंदखण आनी 50 हजार रुपया दंडाची ख्यास्त फर्मायल्या.
फातोड्डें शारांत 7 मार्च 2021 त कामगार कंत्राटदार मिंगेल मिरांडा आनी ताची सासूमाय कॅटारीना पिंटो हांच्यो कुडी तांच्या घरांत मेळ्ळ्यो. ह्या प्रकरणांत फातोड्डें पुलिसांनी मुंबयच्यान तीन कामगारांक ताब्यांत घेतिल्ले. रविनकुमार सडा आनी आकाश घोष हे दुबावीत एका नेण्ट्या वांगड्यां सयत मिरांडा हांच्या भाड्याच्या कुडींत रावताले. मिंगेल मिरांडा आनी कामगार हांचे मदीं मजुरीच्या पयशां वयल्यान वाद जातालो. ह्या रागांतल्यान कामगारांनी हे दोन खून केल्ले. हे सुनावणे वेळार 24 साक्षीदारांचे जबाब न्यायालयांत नोंद केलें. नेण्ट्या दुबाविताची केस बाल न्यायालयांत हस्तांतरीत केल्या. रविनकुमार सडा आनी आकाश घोष ह्या दोगांय दुबावितांक खूनाच्या कलमा खाला न्यायालयान गुन्यांवकार थारायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
