भांगरभूंय | प्रतिनिधी
2026 चे पुद्दुचेरी विधानसभा वेंचणुके संबंदी व्हडली घोशणा
पुद्दुचेरीः लचिया जननायग कच्ची (LJK) पक्षाचे फुडारी आनी टीव्हीके पक्षाचे फुडारी आधार अर्जुन हांचो मेवणो चार्ल्स मार्टिन हांणी वेंचणुकेची व्हडली घोशणा केली. 2026 चे पुद्दुचेरी विधानसभा वेंचणुकेत जैत मेळून सरकार स्थापन केल्यार उदरगती खातीर म्हज्या बोल्सांतल्यान 100 कोटी रुपया खर्च करतलों, अशें तांणी सांगलां.
पुद्दुचेरींत वेंचणूक जावपाक फकत कांय म्हयने उरिल्ल्यान चार्ल्स मार्टीनान बायलां सशक्तीकरणाचेर खासा भर दिवन स मुखेल कल्याणकारी येवजण्यो जाहीर केल्यो.
बायलां खातीर थेट अर्थीक मजती विशीं उलयतना तांणी म्हणलें, सरकार बायलांक म्हयन्याक 2 हजार रुपया दिता अशें म्हणटात, पूण फाटल्या तीन म्हयन्यांत एकूय रुपया दिवंक नाशिल्ल्याची म्हायती म्हाका मेळ्ळ्या. देखून ही रक्कम वाडोवन म्हयन्याक चार हजार रुपया दिवपाचो हांव विचार करतां. तशेंच वर्सुकी 50 हजार रुपया दितलो अशें तांणी सांगलें.
एक लाख आनी भांगर
चार्ल्स मार्टीन हांणी सांगलें, गरिबी रेशे सकयल (BPL) आशिल्ल्या कुटुंबांतल्या चलयांक लग्न करपा खातीर एक लाख रुपया आनी 10 ग्राम भांगर मेळटले. तशेंच स एलपीजी गॅस सिलिंडर फुकट दितले. गुरवार बायलांक 35 हजार रुपया आनी भुरग्यांच्या योग्य उदरगती खातीर भलायकी किट दितले अशेंय तांणी स्पश्ट केलें. हाचे भायर निराधार आनी आंकवार बायलांक वर्साक 60 हजार रुपया दितले अशेंय तांणी जाहीर केलें.
आवयां खातीर शिक्षण निधी सुरू करतलों. पालकांक भुरग्यांच्या शिक्षणाक खूब खर्च करचो पडटा, रीण घेवचें पडटा. सरकारी शाळांचो दर्जो सुदारपाचें उतर दितां. पालकांनी आपल्या भुरग्यांक सरकारी शाळांनी घाल्यार त्या आवयंक 20 हजार रुपया दितले अशेंय चार्ल्स मार्टीन हांणी सांगलें.
बायलांक ५० टक्के आरक्षण
तशेंच बायलांक राजकी आनी प्रशासकीय प्रतिनिधीत्व दिवपाचें उतर तांणी दिलें. पुद्दुचेरीत 30 विधानसभा मतदारसंघ आनी तीन नामांकीत मतदारसंघ आसात. पूण सध्या फकत एक बायल लोकप्रतिनिधी आसा. आमच्या पक्षांत बायलां खातीर स सुवाती राखून दवरतले. थळाव्या संस्थांच्या वेंचणुकांनी बायलां खातीर 50 टक्के आरक्षण आसतलें आनी सरकारी नोकऱ्यांनीय बायलां खातीर 50 टक्के आरक्षण आसतलें अशें तांणी सांगलें.
खर्च परवडटलो
चाल्स मार्टीन हांणी म्हणलें, हांव स म्हत्वाच्यो येवजण्यो जाहीर करतां. ज्यो नक्कीच पुराय जावंक शकतात. लोक आमकां सत्तेर हाडटले आनी आमी ह्यो येवजण्यो पुराय करतले. चाल्स मार्टीन हांच्या मतान पुद्दुचेरीची लोकसंख्या सुमार 12.5 लाख आसा, तातूंतले 50.9 टक्के बायलां. ह्या सगळ्या येवजण्यांची अंमलबजावणी करपाक वर्साक उण्यांत उणो 1500 कोटी रुपया खर्च येतलो, पूण हो खर्च परवडपी आनी शक्य आसा असोय दावो तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
