भांगरभूंय | प्रतिनिधी
तिरुवनंतपुरमः सध्या दितात त्या राबित्याच्या प्रमाणपत्राच्या जाग्यार कायमस्वरूपी, फोटो आशिल्लें निवास कार्डाची (नेटिव्हिटी कार्ड) तत्वीक रितीन सुरू करपाक केरळ मंत्रीमंडळान मान्यताय दिल्या. मुख्यमंत्री पिनाराई विजयान आयज बिरेस्तारा पत्रकार परिशदेंत ही म्हायती दिली.
ह्या निर्णया वरवीं नागरिकांक आपली वळख, जल्म वा केरळांत दीर्घकाळ रावपाची सुवात परत परत सिद्ध करची पडची ना अशें मुख्यमंत्री विजयान स्पश्ट केलें. लोकांनी आपलें अस्तित्व सिद्ध करपा खातीर कश्ट करचे पडटात ही काळजीची गजाल, कोणाकूच भायर उडोवंक फावना, हाचे खातीर दरेका मनशा कडेन कायदेशीर वैधताय आशिल्लो विस्वासपात्र दस्तावेज आसप गरजेचें आसा अशें तांणी सांगलें.
नवे नेटिव्हिटी कार्ड कायम स्वरुपाचें आसतलें आनी तातूंत फोटो आसतलो आनी तें वेगवेगळ्या सरकारी कामां, येवजण्यां खातीर म्हत्वाचें वळखपत्र आसतलें. संबंदीत मनीस केरळी हेंय सिद्ध जातलें.
मजगतीं, भाजपान हो समाजांत फूट घालपाचो कट अशें म्हणलां. हाचे आड आमी न्यायालयांत वतले, अशेंय राज्य अध्यक्ष राजीव चंद्रशेखर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
