भांगरभूंय | प्रतिनिधी
ह्या नातलांक फकत नाताळचीं झाडां न्हय, तर मनां सजोवया; फकत केक न्हय, तर मोग वांटूंया; शुभेत्साच न्हय, तर उमेद दिवूंया.
दरवर्सा 25 डिसेंबराक संवसारभर मनयतात तो नाताळ हो फकत एक धर्मीक सण न्हय, तर तो मनीसपणाच्यो, मोगाच्यो आनी आशेच्यो भावना जागोवपी उत्सव. ताका ‘खुशालकाय, मोगाची परब’ अशें म्हणटात, कारण ही परब आनंदाची, मोगाचो आनी एकचाराचो संदेश घेवन येता. पयलीं नाताळ क्रिस्ती समाजा पुरतोच मर्यादीत आशिल्लो; पूण आतां तो संवसारभरांतल्या सगळ्या संस्कृतायांचो आनी सगळ्या मनशांचो सण जाला. देखूनच आयज नाताळ घराघरांनी, बाजारपेठांनी आनी मनामनांनी साजरो जाता.
डिसेंबरची थंडी सुरू जाताच वातावरणांत एक वेगळीच ऊब जाणवूंक लागता. झगझगत्या दिव्यांनी नटिल्ले रस्ते, रंगयाळ सोबायेन उजळिल्लीं घरां, सजयल्लीं नाताळचीं झाडां, चर्चांतल्यान घुमपी कॅरोल्स, केक आनी गोडसाणीचो परमळ—हें सगळें पळयलें की मन नकळत प्रसन्न जाता. एकमेकांक दिल्यो शुभेत्सा आनी भेटवस्तू हाका लागून सगळें वातावरण आनंदान भरून वता. ख्रिसमस म्हणल्यार फकत सण न्हय; तो मोगाचो, भोगसणेचो (क्षमेचा), शांततायेचो आनी मानवतायेचो उत्सव.
नाताळाचो मूळ अर्थ समजून घेवपाक आमकां जेजू क्रिस्ताच्या जल्मकाणये कडेन वच्चें पडटा. दोन हजार वर्सां आदीं पॅलेस्टायनांतल्या बेथलेहेम गांवांत एका गोठ्यांत क्रिस्ताचो जल्म जालो. आवयचें नांव मारिया आनी बापायचें जुझे (योसेफ) आशिल्लें. हें बाळक फुडें पुराय मानवजाती खातीर मोग, क्षमा आनी सेवाभावाचो दीपस्तंभ थारलें. क्रिस्ती धर्मा प्रमाण जेजू हे देवाचे पूत आसून ते क्रिस्ती धर्माचे संस्थापक. तांच्या जल्माची खबर एका चकचकीत नखत्राच्या पालवान तीन गिन्यानी मनशां मेरेन पावली. तांणी त्या बाळकाक भांगर, धूप आनी गंधरस ह्यो भेटवस्तू अर्पण केल्यो. ही काणी फकत एक इतिहासीक घडणूक न्हय, तर ती नम्रता, साधेपण आनी विश्वासाचें प्रतीक आसा.
नाताळ आमकां एका बाळकाच्या जल्माची याद करून दिता; पूण त्या परस म्हत्वाचें म्हणल्यार तो आमकां जिवीत-मुल्यांचो संदेश दिता. जेजूचें जिवीत मोग, करुणा, सेवा, सत्य आनी त्याग हांचें जिवंत उदाहरण आशिल्लें. तांणी केन्नाच गिरेस्त-गरिबांमदीं भेद केलो ना, जाती-धर्मांच्यो वण्टी मान्य केल्यो नात. समाजांतल्या दुर्लक्षीत, गरीब, दुयेंत आनी दुख्खी लोकां खातीर तांणी सदांच आपलें काळीज उक्तें दवरलें. देखूनच नाताळ सण हो आत्मपरीक्षण करपाचो, अंतर्मुख जावपाचो आनी स्वतःक एक बरो मनीस घडवपाचो दीस.
नाताळाच्यो परंपरा संवसारभर वेगळ्यो आसल्यो, तरी ते फाटलो भाव एकूच आसा—उमेद वांटप आनी मोग पातळावप. नाताळाक घरां, गोठ्याची सजावट करतात, ती फकत बाह्य न्हय, तर मनांतल्या आनंदाचें प्रतीक आसता.
नाताळच्या आदल्या मध्यानरातीक चर्चींत खाशेली मागणी (प्रार्थना) आयोजीत करतात. लोक एकठांय येतात, कॅरोल्स गायतात, जेजू क्रिस्ताच्या जल्माची याद करतात आनी शांतताये खातीर मागणी करतात. ह्या खिणाक मनशा-मनशां मदलो भेदाभेद विसरतात आनी एकचाराची भावना निर्माण जाता.
भुरग्यां खातीर नाताळ म्हणल्यार सांताक्लॉज. तांबडो भेस, धवें खाड आनी हांसरो चेहरो आशिल्लो सांताक्लॉज हो उमेद, उदारता आनी देणगीचें प्रतीक. तो चॉकलेटी, खेळणीं आनी भेटवस्तू घेवन येता, असो भुरग्यांचो भावार्थ आसता. देखून भुरग्यांचो आनंद द्विगुणीत जाता. सांताक्लॉज ही संकल्पना संत निकोलस हांच्या दयाळूपणाचेर आदारिल्ली आसा, जे गरजू लोकांक गुपीतपणान मजत करताले. म्हणूनच सांताक्लॉज सेवाभावाचो संदेश दिता.
गोंयांत नाताळ व्हडा उत्साहान मनयतात. हो भारतीय आनी पुर्तुगेज संस्कृतायेच्या संगमाचें एक उदाहरण. चर्ची रोशणायेन झगझगतात, रस्त्यांचेर उत्सवाचें वातावरण आनी घराघरांनी उमेदीचो सूर आसता. हांगा ‘बेबिंका’, ‘दोदोल’, ‘नेवऱ्यो’ सारक्या गोड पदार्थां बगर नाताळ अपूर्ण दिसता. हे पदार्थ परंपरा, कुटुंब आनी आपुलकीचें प्रतीक आसात. कॅरोल गायन ही आनीक एक सोबीत परंपरा. गांवागांवांनी लोक पारंपरीक भेस घालून कॅरोल्स गायत भोंवतात. तातूंत उमेद, शांतताय आनी मोगाचो संदेश मेळटा. कॅरोल्स म्हणल्यार फकत पदां न्हय, तर त्यो भावना आसात, थेट काळजाक भिडपी.
नाताळाचें खरें समाजीक म्हत्व तेन्नाच दिसता, जेन्ना लोक गरजूंचो विचार करतात. जायत्यो संस्था आनी व्यक्ती ह्या काळांत अन्नदान, वस्त्रदान, भलायकी शिबिरां आनी मदतीचे उपक्रम चालीक लायतात. गरजूक मदत करप, एकाकी मनशाकडेन संवाद साधप, उपाशी पोटाक अन्न दिवप आनी दुख्खी मनाक आदार दिवप— हातूंतल्यानच नाताळाचो खरो आत्मो प्रगट जाता. कारण मानवतेची सेवा म्हळ्यारच देवाची सेवा, हो संदेश जेजून दिला.
आजचें जग झूज, हिंसा, असहिष्णुता, ताण-तणावान भरलां. सोशल मीडियाक लागून मनीस जोडल्यात तरी मनां पयस जाल्यात. अशा काळांत नाताळाचो संदेश चड म्हत्वाचो थारता. तो याद करून दिता की संवाद म्हत्वाचो, माणुसकी अजून जिवंत आसा आनी आशेचो दिवो अजून पालोवंक ना. नाताळ म्हळ्यार फकत एक दीस न्हय; ती एक नजर—शांततायेची, सेवेची आनी समर्पणाची. वर्सभर मनांत शांतताय सांबाळ्ळी, हातांतल्यान सेवा घडयली आनी अहंपण कुशीक दवरून मोग पातळायलो, तर समाज नक्कीच चड सुंदर जावंक शकता.
नाताळ नव्यान सुरवात करपाची संद दिता. पोरणीं तिडक, मतभेद आनी कोडसाण विसरून नवे उमेदीन फुडें वचपाचो संदेश दिता. ल्हानशा गोठ्यांत जल्मल्ल्या बाळकान पुराय संवसाराक मोगाची वाट दाखयली—हीच नाताळाची खरी देणगी. ह्या नाताळाक फकत नाताळचीं झाडां न्हय, तर मनां सजोवया; फकत केक न्हय, तर मोग वांटूंया; शुभेत्साच न्हय, तर उमेद दिवूंया.
नाताळाचीं परबीं— मोग, भोगसणें आनी मनीसपणाच्या उजवाडान तुमची जीण उजळूं!
प्रमिला प्रसाद फळदेसाय
9011834847
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
