भांगरभूंय | प्रतिनिधी
ते शाळेंत हावें 13 वर्सा नाताल मनयला. पूण केन्नाच अशें दिसलें ना की तो एक क्रिस्तांवांचो सण म्हूण. अशें दिसले की तो आमचो सगल्यांचोच सण.
नातलां म्हणटकीच सगळ्यांत पयलीं याद येता ती म्हजे शाळेंतली. हांव शाळेंत आसलें तेन्ना नाताल येवचे आदींच आमी सगली तयारी करपाक सुरवात करतालीं. आमची शाळा सेंट जॉजफ हायस्कूल. कॉन्वेंट शाळा आशिल्ल्यान नातलांची मजाच वेगळी आसली. 10-20 दीस पयलींच नातलांची तयारी करपाक सुरवात करतालीं. वेगवेगळ्या वर्गांतलीं भुरगीं, तांचे वांगडा टिचरी मेळून नाच, नातलांचीं गीतां, नखेत्रां, कार्डा आनी हेर बरीच तयारी करतालीं.
ते शाळेंत हावें 13 वर्सा नाताल मनयला. पूण केन्नाच अशें दिसलें ना की तो एक क्रिस्तांवांचो सण म्हूण. अशें दिसले की तो आमचो सगल्यांचोच सण. आमी सगळ्या धर्माची भुरगीं, टिचरी मेळून हो सण व्हडा उमेदीन मनोवपाक तयारी करतालीं. जशे जशे दीस लागीं पावताले तशीं तशीं अमची उमेद आनीक वाडत वताली. हरशी 25 डिसेंबराक नाताल मनयतात, पूण आमी आमचे शाळेंत 21 वा 23 डिसेंबराक मनयतालीं. 21 डिसेंबर ह्या दिसा सगळीं भुरगीं नातलांचे कपडे घालून तयार जावन येतालीं. ज्या ज्या भुरग्यांनी नखेत्रां, कार्डां तयार केल्यांत, तीं भुरगीं ती घेवन येतालीं आनी मागीर नखेत्रां आनी कार्डा इगर्जी मुखार सजयतालीं. सकाळच्या वेळार नातलांचो कार्यक्रम सुरु जातालो. भुरग्यांचो नाच, नातलांचीं गीतां हें सगळें चलतालें.
हें सोंपतकीच सांता क्लाॅज जावन एकटो येतालो आनी सगळ्या भुरग्यांक खोशी करतालो. तो भुरग्यांक चॉकलेटी आनी भेटवस्तू दितालो आनी सगळ्या वांगडा नाचतालो. मागीर आमी क्रिस्तांव भुरग्यांनी केल्ले गोठे पळोवपाक वतालीं.
अशे तरेन आमी व्हडा उमेदीन नाताल मनयतालीं. पूण आतां हें सगळें म्हज्या मनांत आनी यादींत आसा. शाळेंतल्या नातलांची याद काडटा तेन्ना पयलींच्यो सगल्यो यादीं परतून दोळ्यां मुखार येतात.
आशिता सातर्डेंकार
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
