भांगरभूंय | प्रतिनिधी
…. हे खातीर राजकी वावरा संबंदी जाणवाय घेवंक तरणाट्यांनी शिकूंक जाय. सगलेच कडेन अणभव मेळना, थोडें शिकचें पडटा.
नातालांच्या ऐन तोंडार जिल्हा पंचायतीची वेंचणूक जाली आनी सत्तर टक्के वयर मतदान जाल्ले वेंचणुकेंत भारतीय जनता पक्षान (भाजपा) पन्नासांतले एकुणतीस जागे मेळोवन वर्चस्व दाखयलें. काँग्रेस पक्षाक धा जाग्यांचेर समाधान मानतना फकत साश्टींत मजल मारूंक मेळ्ळी जाल्यार हेर पक्षांनी राजकारणांत आपलें अस्तित्व दाखयलें. वेंचणूक जावंचे आदीं भाजपाक एकठांय रावून हारोवंक सोदतल्या पक्षांचें चित्र मुखावेले विधानसभा वेंचणुके आदीं उग्तें जालें. वेंचणुकेचे उमेदवार जरी पक्ष थारायता जाल्यार तांकां वेंचून हाडपाचें काम प्रजा करता हें पक्षान लक्षांत दवरूंक जाय. परत एक फावटीं प्रजेन हेंच सिद्ध करून दाखयलां. एक वेळार काँग्रेस पक्ष लोकाक विस्वासांत घेवन उमेदवार विंचताले, तें काम आयज भाजपा करता आनी लोकराजाचेर हक्क गाजयता. पन्नास जिल्हा पंचायत वांगड्यां मदीं बारा क्रिस्तांव अस्तुऱ्यांचें नाताल बरें फुल्लें, तांतूंत सात काँग्रेसीच्यो, एक अपक्ष, एक गोवा फॉरवर्ड, एक भाजपा, एक रिवोल्युशनरी गोवन्स पक्ष (आरजीपी) आनी एक आम आदमी पक्ष (आआप). हेरांनूय हो नाताल काळ खुशाल सारचो आनी भौसाक सरकारी सेवा दिवंची.
विरोधी पक्ष कित्याक एकठांय आयले नात?
गोंयांत जिल्हा पंचायत वेंचणूक जाहीर जावंचे आदीं सगळे भाजपा विरोधी पक्ष एकठांय येवपाची भास उलयताले. तश्यो गुपीत बसकाय जाल्ल्यो. काँग्रेस, गोवा फॉरवर्ड पक्ष, आरजीपी, आआप हांचे मदीं राज्य पातळीचेर आनी राश्ट्रीक पातळीचेर उलोवणीं जाल्लीं, पूण सगळे एका मेजार येवप शक्य जालें ना, ताका खूब कारणां आसात. सगळ्यां कडें बरे- बरे वक्ते आसात आनी ते एकवटीक विरोधी युती अशें मानचे बदला ते आपल्या भागीदार पक्षांच्योच चुकी काडूंक लागले. जंय एकामेकांक पातयेनात थंय युती कशी शक्य आसा? तरी काँग्रेस आनी गोवा फॉरवर्डान एकठांय रावून वेंचणूक लडयिल्ल्यान कितें तरी वेगळेपण दिसलें. काँग्रेस पक्ष दुसऱ्यांचेर कितलो विस्वास दवरता काय? आआप सगळ्यां बराबर कित्याक रावलो ना? रिवोल्युशनरी गोवन्स नीज गोंयकारांचें हीत सांबाळपी म्हणटात, तशें दुसऱ्या पक्षांक दिसना? कितेंय आसलें जाल्यार पासून आपसांतलीं मतां फुटलीं आनी भाजपाक चान्स पडलो न्ही? तरी तशें साश्टींत जालें ना म्हूण काँग्रेसान मान राखलो. सगळे विरोधी पक्ष एकठांय आयिल्ले जाल्यार निकाल जेरूल वेगळो थारतलो आशिल्लो.
भाजपाक कित्याक जैत मेळ्ळें?
जैत दिवपी मतदार. जाका लागून मतदार खुशाल ताका ते मत दितात. हे वेंचणुकेंत भाजपाक सरासरीन सुमार चाळीस ठक्के मतां मेळ्ळ्यांत तरी मतदारांनी तांच्या २९ उमेदवारांक निवडून हाडले. हालींच सुरू केल्ली ‘म्हजें घर’ येवजण यशस्वी जाल्या अशें मुख्यमंत्र्याचें मत आसा. विरोधी पक्ष एकठांय आयले नांत देखून भाजपाक जायत्या जाग्यांचेर फायदो जाला, हें सांगपाची गरज ना. कांय कडेन तांकां निसरतें जैत मेळ्ळां. आखरेक जैत हें जैत आसता. कांय कडेन भाजपा हारपाचें कारण आसा पक्षा भितरले मतभेद. साश्टींत भाजपान बरोच मार खाला हाचें एक कारण, फाटले विधानसभा वेंचणुकेंत नेटान वावरिल्ले कार्यकर्ते हे फावट दिसले नात. तरी मुखावेले विधानसभा वेंचणुके आदीं भाजपाक जेरूल आपूण कित्याक फाटीं पडल्यात ताचीं कारणां दिसल्यांत आसतलीं.
विधानसभेची सेमी फायनल कशी जाली?
नातालां तोंडार आसतना ही वेंचणूक जाली. क्रिस्तांव लोक नातालांचे तयारेंत आशिल्लो. तरी मत घालूंक आयले. हरशी जिल्हा पंचायत वेंचणूक इतली म्हत्वाची न्हय म्हणटात, पूण ती खरेंच विधानसभेची सेमी फायनल आसता. 2022 वर्सा जाल्ले विधानसभा वेंचणुकेंत भाजपाक काठार जैत मेळिल्लें, पूण ताणीं मागीर काँग्रेसीच्या आमदारांक व्हरून आपणाली सत्ता घट केली. तांचे बराबर महाराश्ट्रवादी गोमंतक पक्ष आशिल्लो. आम आदमी पक्षान आपणालें खातें उगडिल्लें, तें मतादिक्य तांचे कडेन आसा काय? आरजीपी भरपूर खर्शेतात, पूण तांकां फावो तितलो तेंको मेळना. जिल्हा पंचायत वेंचणुकेंतूय ताणीं बरोच नेट धरिल्लो. अपक्ष उमेदवार खरे खेळ बदलपी आसतात. ताणीं सरासरीन सुमार साडे सोळा टक्के मतां काडल्यांत, हाची दखल घेवंचीच पडटली. पक्षांक सगळे वळखतात, पूण अपक्षांक पारखप इल्लें जड वता. तांचे फाटल्यान कोण फुडारी आसात तांचेर तांचो फुडार आसता. देखीक कुठ्ठाळेचो आमदार आंतोनियो वाज आपले घरकान्नी फाटल्यान रावलो आनी ती (मर्सियाना) जिखून आयली. फाटले विधानसभेंत कुडटरेंत आलेक्स रेजिनाल्द लॉरेंसान अपक्ष रावून इतिहास घडिल्लो. ताका फाटल्या तीन कार्यकाळाचो अणभव आशिल्ल्यान ताणें वेंचणूक जिखिल्ली. आतां 2027 वर्साचे सुरवेक विधानसभा वेंचणूक जावपाची आसा आनी खंयच्या पक्षाचे मतदार भारी आसात तांची सध्या पुरती वळख मेळ्ळ्या. पूण हें चित्र तेन्ना म्हणल्यार अशेंच उरतलें अशें सांगूंक जायना. कितेंय आसूं, भाजपान अदमास लायिल्ले प्रमाणें तांकां जैत मेळ्ळें. नातालांच्या हुमऱ्यार जिखिल्ले उमेदवार खुशाल जाले आनी पडिल्ल्यांनीय दुखी जावपाची गरज ना, कित्याक मदलो सुमार एका वर्साचो काळ विधानसभेची फायनल मॅच खेळूंक आसा.
सोंपयतना…
मतदार दिसान- दीस शाणो जायत वता काय? वा मतदाराची दिशा आजून थारूंक ना? तरणाटी पिळगी मतदानांत भितर सरल्या ती राजकारणीक नदरेन विचार करता काय आपणाक मत आयलां म्हूण कोणाक तरी वा कोण सांगता म्हूण मत मारता? हे खातीर राजकी वावरा संबंदी जाणवाय घेवंक तरणाट्यांनी शिकूंक जाय. सगळेच कडेन अणभव मेळना, थोडें शिकचें पडटा. राजभास कायदो पास जाले उपरांतचे वेंचणुकेंत कितल्याच साहित्यिकांनी वेंचणुकेंत रस दाखयिल्लो. कितल्या जणांक जैत मेळ्ळें तें म्हत्वाचें न्हय, पूण एक नवें वारें व्हांविल्लें. लोकाक तें नाका जालें कित्याक आमचे चड-शे मतदार पक्ष पातळीचेर विस्वास दवरतात. आयजूय तेंच पळोवंक मेळटा. भारतीय लोकशायेंत राजकारण्यांक निवृत्ती ना कित्याक तांकां लोक विंचून काडिनात तर तांकां निवडून हाडटात. राजकारणांत थोड्यांची घराणेशाही जाल्या. हेंच आमच्या तरणाट्यांनी वळखुपाची गरज आसा.
नातालांचो संदेश आसा, वाट तयार करात. वायट सोडून बरें करात. कुडींतली, मनांतली घाण पयस करात. हे जिल्हा पंचायत वेंचणुकेंत कांय खरेंच बऱ्या उमेदवारांक सोड्त फुटल्या, ताणीं गोंयच्या बऱ्या विकासा खातीर खांद मारचो. वेळ सुरू जाला फुडले विधानसभेच्या वेंचणुकांची विचार करुंक. मुखा वेल्या राजकारणांत आमचे तरणाटे लक्ष घालतले? विचार जावंदी. समेस्त गोंयकारांक नातालांची हुनहुनीत परबीं!
विन्सी क्वाद्रूस
राय, साश्ट (मो : 9822587498)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
