भांगरभूंय | प्रतिनिधी
भांगरभूंय । प्रतिनिधी
कोरगांवः राष्ट्रीव पावंड्या वयले प्रोफेशनल कब्बडी लीग सर्तीच्या अंदूच्या सिझनांत गोंयच्या नेहाल बाळा सावळ देसाय हांका उत्तर प्रदेशाच्या संघा वतीन खेळपा खातीर वेंचून काडिल्ल्यान मिशन फॉर लोकलाचो फुडारी राजन कोरगांवकार हांणी ताची भेट घेवन ताकां परबीं भेटयल्यांत. हे सर्ती खातीर खेळपाक वेंचून काडिल्लो नेहान हो पयलोच गोंयकार खेळगडो आसा.
पेडणेच्या आदर्श संघांतलो नेहाल गोंयचो पयलो प्रोफेशनल कब्बडी खेळगडो आसा. 24 वर्सां पिरायेच्या नेहालाक युपी योद्धा पंगडान 10 रुपयांनी विकतो घेतला. सावळवाडो हांगच्या नेहालान म्हाविद्यालयीन आनी राष्ट्रीय कब्बडी सर्तीनी आपल्या खेळाची छाप सोडल्या. रायडर म्हणून तो खेळटा. हालींच हरियानात जाल्ल्या राष्ट्रीय सिनियर कब्बडी सर्तींत गोंय पंगडाक तिसरी सुवात मेळोवन दिवपाक तांणे म्हत्वाचें योगदान दिल्लें. ताचो आक्रमक खेळ पळोवन युपीच्या पंगडान ताका आपल्या पंगडांत घेतलां.
पालकांनी जर भुरग्यांक तांच्या आवडीचें मळ वेंचून काडपाक दिल्ल्यार ते तातूंत येशस्वी जावपाक शकतात. म्हज्या पालकांनी जाय तशें मार्गदर्शन केल्ल्यान आपूण कब्बडी खेळांत येश मेळोवपाक शकलों. बापूय आनी काका कब्बडी खेळात तरजेब आशिल्ल्यान तांचे पसून आपल्याक स्फूर्त मेळ्ळी अशें ताणे सांगलें.
सावळवाडो हांगा इनडोअर स्टेडियम बांदून सरकारान सध्या भाड्यान दिलां. नेहाल सारक्या खेळगड्यांक खेळपा खातीर मैदानाची गरज आसा. सरकारान हें स्टेडियम थळाव्या खेळगड्यांक सराव करपा खातीर दिवपाक जाय. नेहालाक उर्बां मेळची हे खातीर ताका सरकारी नोकरी दिवपाक जाय अशें राजन कोरगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
