भांगरभूंय | प्रतिनिधी
सावियो रॉड्रिग्जाच्या ‘ट्विटा’क लागून बोवाळ
कोण कसलेय आरोप करपाक शकतात : दामू नायक
आरोपांची चवकशी जातली : मॉवीन गुदिन्हो
पणजी : घरनिर्माण प्रकल्पा खातीर भाजपच्या पदाधिकार्यां कडेन एका आमदारान १० लाख रूपया मागिल्ल्याचें ट्विट भाजपाचे आदले पदाधिकारी सावियो रॉड्रिग्ज हांणी केलां. ताका लागून बोवाळ जाला.
सावियो हे सध्या भाजपाचे पदाधिकारी नात. ते मुळावे वांगडी आसात काय नात, तें म्हाका खबर ना. कोणूय कसलेय आरोप करपाक शकतात. ह्या आरोपांत कसलेंच तथ्य नासता, अशें प्रदेश भाजप अध्यक्ष दामू नायक हांणी म्हणलां. आरोप केले म्हूण कितलो विस्वास दवरचो? पयशे मागिल्ल्याच्या आरोपाची चवकशी जातली, अशें येरादारी मंत्री आनी भाजपाचे ज्येश्ठ आमदार मॉवीन गुदिन्हो हांणी म्हणलां.
नोकरे खातीर पयशें दिवचे पडटात, अशे गंभीर आरोप हाचे पयलीं जाल्यात. आदले आमदार वा मंत्र्यांनी हे आरोप केल्यात. मात एकूय आरोप सिद्ध जावंक ना. जिल्लो पंचायत वेंचणूक निकाल जाले उपरांत सावियो रॉड्रिग्ज हांच्या ट्विटरा वेल्या पोस्टाक लागून परत भ्रश्टाचाराचो विशय चर्चेंत आयला.
घरनिर्माण प्रकल्पाक मान्यताय मेळपा खातीर दक्षीण गोंयच्या एका पदाधिकार्या कडेन पयलेच खेपो वेंचून आयिल्ल्या आमदारान १० लाख रूपया मागले. हे पयशे संबंदीत मंत्र्याक दिवचे पडटले, अशें त्या आमदारान स्पश्ट सांगलें. कांय तेपा उपरांत हो पदाधिकारी पक्षाच्या मोठ्या पदार पावलो तेन्ना ताणें सरळ हाचे वेल्यान त्या मंत्र्या कडेन वाद घालो. मंत्र्यांन मात पयशे मागिल्ल्याचें न्हयकारलें. ताणें आमदाराक आपोवन हाडलो आनी १० लाख रूपया दोन हप्त्यांनी दोन सप्तकां भितर परत दिवपाक लायले, असो आरोप सावियो हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
