भांगरभूंय | प्रतिनिधी
वास्को : गोवा शिपयार्डान बांदिल्लें ‘समुद्र प्रताप’ ही पयली प्रदूशण नियंत्रण बोट एके कार्यावळींत औपचारिक तरेन भारतीय तटरक्षक दळाक भेटयली. हे बोटीच्या आसपावाक लागून भारताचे दयारचे आत्मनिर्भरतेंत एक व्हड पावल घेतलां. भारत सरकाराच्या ‘आत्मनिर्भर भारत‘ आनी ‘मेक इन इंडिया’ उपक्रमांक व्हड बळ मेळ्ळां.
हे कार्यावळीक भारतीय तटरक्षक दळाचे महानिरीक्षक व्हि. के. परमार, महानिरीक्षक आनी कमांडिंग ऑफिसर ए.के. भामा, महानिरीक्षक दिपू सी.आर. गोवा शिपयार्डचे अध्यक्ष आनी वेवस्थापकीय संचालक ब्रजेश कुमार उपाध्याय, ऑपरेशन्स संचालक नेल्सन डिसौजा ( निवृत्त रिअर डमिरल), वित्त संचालक जहांगीर आलम अन्सारी, तशेंच भारतीय तटरक्षक दळाचे आनी गोवा शिपयार्डचे वरिश्ठ अधिकारी, बोटीचे कर्मचारी हाजीर आशिल्ले.
‘सागर प्रताप’ हे दर्यांतले तेल गळटीक तोंड दिवपाक स्वदेशी बनावटी वरवीं विकसीत केल्ल्यो दोन हायब्रीड प्रदूशण नियंत्रण जहाजांच्या मालिकेंतली पयली बोट. हें जहाज आयज मेरेनच्या भारतीय तटरक्षक दळाच्या ताफ्यांतलें सगल्यांत व्हड बोट. ही बोट तटरक्षक दळाची ऑपरेशन तांक वाडोवपाक मजत करतली. बोट हल-फ्लश्ड सायड स्वीपिंग आर्म्सन सुसज्ज आसा, जाका लागून प्रवासा मजगतीं तेल गळटी प्रभावीपणान आडावपाक मेळटली, तशेंच हातूंत फाटीं घेवपा सारके स्टर्न थ्रस्टर्स आसात, जे प्रदूशण प्रतिसाद आनी स्थान-नियंत्रण कार्या मजगतीं उत्कृश्ठ कुशळटाय दितात. हें डायनॅमिक पोझिशनिंग तांक आशिल्लें पयलें भारतीय तटरक्षक दळाची बोट, जें आव्हानात्मक सागरी परिस्थितींत उच्च अचूकतेचीं कामां सुनिश्चीत करता. ११४.५ मीटर लांबी आनी १६.५ मीटर रुंदी, तशेंच ४,१७० टन विस्थापन तांक आशिल्ले हे बोटीचेर १४ अधिकारी आनी ११५ खलाशी आसतले. ही बोट तेल गळती सोदपाक, हलक्या ते सामकें चिकट तेलाचें प्रदूशक पदार्थ एकठांय करपाक, दुशीत पदार्थांचे विश्लेशण करपा खातीर, नुशीत उदकांतल्यान तेल वेगळें करून तें बोटीचेर सुरक्षीतपणान सांठोवपाक प्रगत प्रणालींनी सुसज्ज आसा, जाका लागून विशेश अर्थीक मळार आनी ताचे पलिकडे सर्वसमावेशक प्रदूशण प्रतिसाद कामां करप शक्य जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
