भांगरभूंय | प्रतिनिधी
कुजिरा स्टेडियमाक दितलें अटलजींचें नांव : वाजपेयींच्या वाडदिसा निमतान फाल्यां कार्यावळी
पणजी : कॉंग्रेसीन सत्तेंत आसतना उदरगती संबंदीच्या प्रकल्पांक फकत गांधी घराण्यांतल्याच मनशांचीं नांवां दिलीं. हो घराणेशायेचोच प्रकार थारता. भाजप सरकारान मात अटलबिहारी वाजपेयी, डॉ. श्यामाप्रसाद मुखर्जी तशेंच म्हान राष्ट्रपुरूशांचीं नांवां दिवन तांचें कार्य तशेंच यादींची जतनाय करपाचो येत्न केलो, अशें प्रदेश भाजप अध्यक्ष दामू नायक हांणी म्हणलें.
ते आयज पणजेंत पत्रकार परिशदेंत उलयताले.
महात्मा गांधी, इंदिरा गांधी, राजीव गांधी हांचीं नांवां दिवपांत गैर कांयच ना. मात ह्या एकाच घराण्यांतल्या मनशांचीं नांवां दिवप ही घराणेशाय थारता. देशा खातीर त्याग केल्ल्या वा व्हड योगदान दिल्ल्या हेर राष्ट्रपुरूशांचीं नांवां लेगीत प्रकल्पांक दिवप गरजेचें. हाचे खातीर भाजप सरकारान अटलबिहारी वाजपेयी, डॉ. श्यामाप्रसाद मुखर्जी, दीनदयाळ उपाध्याय, सरदार वल्लभभाय पटेल अशा राष्ट्रपुरुषांचीं नांवां प्रकल्प तशेंच येवजण्यांक दिल्यांत, अशें दामू नायक हांणी सांगलें.
आदले प्रधानमंत्री सर्गेस्त अटलबिहारी वाजपेयी हांच्या जल्मदिसा निमतान फाल्यां २५ डिसेंबराक राज्यभर विवीध कार्यावळी जातल्यो. कुजिराच्या अॅथलेटिक स्टेडियमाक अटलजींचें नांव दितलें. हेर कडेन लेगीत तांचें नांव विवीध प्रकल्पांक दितले. अटलजींच्या जल्मदिसा निमतान सप्तकभर सगळ्या मतदारसंघांनी कार्यावळी जातल्यो. तांचे जिणेचेर आदारीत प्रदर्शनां, कवी संमेलनां जातलीं. कार्यावळीं खातीर उत्तर तशेंच दक्षीण गोंयांत समिती स्थापन जाल्यात, अशी म्हायती दामू नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
