भांगरभूंय | प्रतिनिधी
अमरोहा : उत्तर प्रदेशांतल्या अमरोहा जिल्ह्यांतल्यान एक धक्को दिवपी घडणूक मुखार आयल्या. जंक फूड चड खाल्ल्यान यत्ता अकरावेंतले १६ वर्सां पिरायेचे चलयेक मरण आयलां. अहाना अशें हे चलयेचें नांव. तें घरचें जेवण न्हयकारून चाऊमीन, बर्गर, पिझ्झा अशे फास्टफूड खातालें, अशें कुटुंबीयांनी सांगलें.
अहानाक जंक फुडाचें वेसन लागिल्लें. कुटुंबीयांनी जायते फावट समजावन सांगून लेगीत तिची संवय सुटूंक ना. हेच संवयेक लागून तिचे भलायकेचेर गंभीर परिणाम जाले.
कांय दिसां आदीं अहानाच्या पोटांत दुखूंक लागिल्ल्यान ताका बेगोबेग मोरादाबादच्या एका खासगी हॉस्पिटलांत दाखल केलें. तपासणेंत दोतोरांक धक्को दिवपी गजाल समजली. बरोच काळ प्रक्रिया केल्लें जेवण जेविल्ल्यान तिच्या झोळयांक खुबशे सुवातेर बुराक पडिल्ले आनी त्यो एकामेकाक दशिल्ल्यो. ३० नोव्हेंबराक दोतोरांनी तिचेर बेगोबेग शस्त्रक्रिया केली. शस्त्रक्रिये उपरांत अहानाचे भलायकेंत मात्शी सुदारणा दिशिल्ल्यान तिका घरा व्हेल्ली. उपरांत परत पोटांत दुखता म्हूण ताका हाॅस्पिटलांत व्हेलें मात ताका कांय दिसांनी उपचार घेतना मरण आयलें.
आयज जायते लोक जंक फूड खातात. सद्दां सांजवेळा घरांत बसून चिकन, पिझ्झा, बर्गर आॅर्डर करतात. तांणी ह्या खाणाचेर नियंत्रण दवरपाक जाय, अशें भलायकी तज्ञ म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
