भांगरभूंय | प्रतिनिधी
पणजीः नाताळाक दोन दीस उरल्यात आनी जायते जाण नाताळ आनी नवें वर्स मनोवपाक गोंयांत येतात. गोंय आनी कोंकणांत येवपा खातीर वेगवेगळ्या राज्यांतल्या पर्यटकांक विशेश रेल्वे सुरु केल्यात. आतां पंजाब ते गोंय विशेश रेल्वे कोंकण मार्गाचेर चलतली. अमृतसर ते मडगांव ह्या रेल्वेंक लागून शेंकड्यांनी प्रवासी आनी पर्यटकांक थाकाय मेळ्ळ्या.
नाताळ आनी नव्या वर्साच्या निमतान प्रवाशांची गर्दी उणी करपा खातीर रेल्वे प्रशासनान उत्तर रेल्वेच्या समन्वयान रेल्वे क्रमांक 04694 / 04693 अमृतसर ते मडगांव अमृतसर आरक्षित विशेश रेल्वे चलोवपाचो निर्णय घेतला. राज्यांतल्या कोंकण रेल्वे मार्गाचेर 12 रेल्वे स्टेशनांचेर ही रेल्वे थारतली. हाका लागून राज्या भितर प्रवास करपूय सोयीचें जातलें. पनवेल सावन सिंधुदुर्गा मेरेन प्रवाशांक प्रवास करपाक मेळटलो.
कोंकण रेल्वेन दिल्ले म्हायती प्रमाण, रेल्वे क्रमांक 04694 अमृतसर ते मडगांव आरक्षित विशेश एक्सप्रेस 27 डिसेंबर आनी 1 जानेवारीक सकाळीं 5.10 वरांचेर अमृतसर सावन सुटतली. ही रेल्वे दुसऱ्या दिसा रातच्या 11.55 वरांचेर मडगांव पावतली. रेल्वे क्रमांक 04693 मडगांव ते अमृतसर आरक्षित विशेश एक्सप्रेस 24 डिसेंबर, 29 डिसेंबर आनी 3 जानेवारीक सकाळीं 8 वरांचेर मडगांवच्यान सुटतली. ही रेल्वे तिसऱ्या दिसा सकाळीं साडे चार वरांचेर अमृतसराक पावतली. मजगतीं कांय समस्या जाल्यार रेल्वे उसरां पावपाची शक्याताय आसा.
ही गेल्वे बियास, जालंधर सिटी, लुधियाना, अंबाला कँट, पानीपत, दिल्ली सफदरजंग, मथुरा, गंगापूर सिटी, सवाई माधोपूर, कोटा, रतलाम, वडोदरा, सूरत, वसय रोड, पनवेल, रोहा, माणगांव, खेड, चिपळूण, संगमेश्वर रोड, रत्नागिरी, राजापूर रोड, कणकवली, कुडाळ, सावंतवाडी रोड, थिवे आनी करमळी स्टेशनांचेर थारतली. ह्या रेल्वेंत वट्ट 21 लिंके हॉफमॅन बुश (एलएचबी) डबे आसतले. प्रवाशांक हे रेल्वे खातीर आयआरसीटीसी संकेतथळार, प्रवासी आरक्षण पद्दती वरवीं बुकींग करपाक मेळटलें अशी म्हायती कोंकण रेल्वेन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
