भांगरभूंय | प्रतिनिधी
उत्तरे सयत दक्षिणेंत जैताचे दिकेन पावल: आप, गोवा फॉरवर्ड, आरजीक खातें उघडपाक येस
पणजी : विरोधी पक्षांक फाटीं उडयत भाजप – मगो युतीन दोनूय जिल्लो पंचायतींचेर जैत मेळयलें. सांजेवेळार ४ वरां मेरेन उत्तर तशेंच दक्षीणेंतल्या चडश्या मतदारसंघांनी भोवतेक मतदारसंघांतली मतमेजणी पुराय जावन निकाल जाहीर जाला. उत्तरेक हरमल मतदारसंघ सोडल्यार भाजपाचे उमेदवार जैतिवंत थारल्यात. उत्तरेक भाजपची वाटचाल भोव मता कडेन चालूच आसा. दक्षीणेंत अपक्षांच्या मदतीन भाजपाचोच बावटो हुबोवपाचें निश्चीत जालां. उत्तर गोंयांत भाजपाचे १२, आरजीचो १, कॉंग्रेस आनी मगो १ जाल्यार २ अपक्ष उमेदवार वेंचून आसयले.
उत्तरेंत हळदोणा मतदारसंघाच्या आधारार खातें उघडपाक कॉंग्रेसीक येस आयलां. जाल्यार हेर कडेन कॉंग्रेसची कामगिरी सुमार दर्जाची आसा. दक्षीण गोंयांत आप आनी गोवा फॉरवर्डाक आपलें खातें उगडपाक येस आयलां. युती तुटपाक कारण थारिल्ली कॉंग्रेसची सांताक्रुजची जागा आरजीन घेतली. सांताक्रुज मतदारसंघांत जैत मेळोवन आरजीन जिल्लो पंचायतींत आपलें अस्तित्व राखलें.
लाटंबार्से, होंडा, नगरगांव, केरी ह्या मतदारसंघांत अदीक मतदान जाल्लें. ह्या मतदारसंघांनी भाजपाकूच येस मेळ्ळां. भलायकी मंत्री विश्वजित राणे, आमदार देविया राणे, पर्यटनमंत्री रोहन खंवटे, जेनिफर मोन्सेरात, समाज कल्याण मंत्री सुभाष फळदेसाय हांच्या मतदारसंघांतले भाजपाचे उमेदवार वेंचून आयल्यात. हाका लागून भाजपाच्या मंत्री, आमदारांक जिल्लो पंचायतींत तरी फटको बसूंक ना. दक्षीण गोंयांत भाजपाचे ९, कॉंग्रेस ६, आप, गोवा फॉरवर्ड आनी मगो दरेकी १ आनी २ अपक्ष वेंचून आयल्यात. मतमेजणी सुरू आशिल्ल्यान सांजवेळा मेरेन सगले निकाल लागतले.
जैतिवंत उमेदवार
उत्तर गोंय
भाजप : महेश्वर गोवेकार (शिवोले), फ्रँझिला रॉड्रिग्ज (कळंगूटे), अमित अस्नोडकार (सुकूर), रघुवीर कुंकळ्येंकार (ताळगांव), पद्माकर मळीक (लाटंबार्से), महेश सावंत (कारापूर सर्वण), नामदेव चारी (होंडा), निलेश परवार (केरी), प्रेमनाथ दळवी (नगरगांव), रेष्मा बांदोडकार (रेईश मागूश), कुंदा मांद्रेंकार (मये), गौरी कामत (चिंबल)
मगो : तारा हडफडकार (मोरजी)
कॉंग्रेस : मॅरी मिनेझीस (हळदोणा)
अपक्ष : कविता कांदोळकार (कोलवाळ), राधिका पालयेंकार (हरमल)
आरजी : इस्पेरँका ब्रागांझा (सांताक्रुज)
दक्षीण गोंय
भाजप : समीक्षा नायक (उजगाव गांजे), पूनम सामंत (बोरी), मोहन गांवकार (सांवड्डें), रूपेश देसाय (धारबांदोड्यां), राजश्री गांवकार (रिवण), सिद्धार्थ गांवस देसाय (शेल्डें), अंजली वेळीप (बार्से), सुनील गांवस (सांकवाळे), प्रितेश गांवकार (कुर्टी)
मगो : गणपत गांवकार (कवळें)
कॉंग्रेस : अँथनी ब्रागांझा (नुवें), फ्लोरियानो फर्नांडीस (दवर्ली), संजय वेळीप (गिरदोळी), ऍस्ट्रा डिसील्वा (कुडतर्यां), मालिफा कार्दोज (नावेली), सुमित्रा पागी (खोला)
गोवा फॉरवर्ड : इनासिना पिंटो (राय)
आप : आंतानियो फर्नांडीस (कोलवा)
अपक्ष : सुनील जल्मी (बेतकी, खांडोळा), मर्सियाना वाझ (कुठ्ठाळे).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
