भांगरभूंय | प्रतिनिधी
दिवचल: कारापूर जिल्लो पंचायत मतदारसंघांतल्यान महेश सावंत हे भारतीय जनता पक्षाचे उमेदवार १७४४ मतांनी जिखले. जाल्यार अपक्ष उमेदवार अॅडवोकेट अजय प्रभू गांवकार दुसऱ्या क्रमांकाचेर आयले.
सांखळे मतदारसंघांतले कुडणें पंचायत वाठारांतल्या कार्यकर्त्यांनी महेश सावंत हांकां सोळाशें चड मतांनी आघाडी दिल्ल्यान भाजपाक व्हड जैत मेळप शक्य जालां.
महेश सावंत हांणी प्रतिक्रिया उक्तायतना सांगलें, स फावटीं पंचायत वांगडी आनी दुसरे फावट जिल्लो पंचायत म्हणून आपूण वेंचून आयलां. ह्या नात्यान हें आपलेञ आठवें जैत. केंद्र आनी राज्य सरकाराच्यो येवजण्यो, मुख्यमंत्री डॉ. प्रमोद सावंत हांची ‘म्हजें घर’ येवजण, थळावे आमदार प्रेमेंद्र शेट आनी कार्यकर्ते हांणी दिल्ल्या योगदानाक लागून हें जैत आशिल्ल्याचें तांणी सांगलें.
कारापूर मतदारसंघांत खुबश्या प्रभागांत भाजपाक अॅडवोकेट अजय प्रभू गांवकार ह्या अपक्ष उमेदवारान बरीच टक्कर दिली. मात कुडणें पंचायत वाठारांत भाजपाक खूब व्हड आघाडी मेळिल्ल्यान भाजपचें जैत सुरळीत जाल्ल्याचें चित्र स्पश्ट दिसलें.
आमदार प्रेमेंद्र शेट हांणी ह्या जैता विशीं समाधान उक्तायत सांगले, जनतेन आपल्याक कौल दिला तो आनीक घटमूट करपा खातीर आमी यत्न करतले. तशेंच केंद्र आनी राज्य सरकारच्यो येवजण्यो आनी घरांत पाविल्ल्यो येवजण्यो, हाका लागून जनता खंभीरपणान भाजपा फाटल्यान उबी आसा, अशें तांणी सांगलें.
महेश सावंत हांकां ६२३४, अपक्ष उमेदवार अजय प्रभुगांवकार हांकां ४४९० मतां मेळ्ळीं. स्वप्नील फडटे (गोवा फॉरवर्ड) हांकां १६२२, जाल्यार राज गांवकार हांकां २१०, अनिल नायक हांकां २६५ मतां मेळ्ळीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
