भांगरभूंय | प्रतिनिधी
वास्को: सांकवाळे जिल्लो पंचायत मतदार संघांतल्यान अपेक्षे प्रमाण भाजपाचे सुनील गांवस, जाल्यार कुठ्ठाळे जिल्लो पंचायत मतदार संघांतल्यान अपक्ष उमेदवार मर्सियना वाझ हीं जैतिवंत जालीं. आदले जिल्लो पंचायत वेंचणुकेंत सांकवाळ मतदार संघांतल्यान अनिता थोरात विरोधा विणें वेंचून आयिल्ली. अंदूं सुनील गांवस हे १९०२ मतांनी वेंचून आयल्यात. कुठ्ठाळेच्या २०२२ चे पोटवेंचणुकेंत मर्सियना वाझ सुमार तीन हजार मतांनी वेंचून आयिल्ली. हे वेंचणुकेंत तांचीं मतां १८५८ चेर आसात. सुनील गांवस हांच्या जैता विशीं मंत्री मावीन गुदिन्हो हांणीय ही उदरगतीची पावती आशिल्ल्याचें सांगलें. जाल्यार कुठ्ठाळेचे आमदार आंतोनिया वाझ हांणीय विकासकामांक लागून हें जैत मेळिल्ल्याचें स्पश्ट केलें.
सांकवाळे जिल्लो पंचायत मतदार संघांतल्यान सुनील गांवस (भाजपा), वसंत नायक (कॉंग्रेस), आलेख नायक (आप), अच्युत नायक, गिल्बर्ट मारियनो रॉड्रिग्ज, कालीदास वायंगणकार, शिवानंद नागवेंकार,राजेश शेट्टी (सर्व अपक्ष) अशे आठ उमेदवार आशिल्ले.हातूंत सुनील गांवस आनी मारियनो रॉड्रिग्ज हांचे मदल्या झुजांत गांवस हांकां ६११०, जाल्यार रॉड्रिग्ज हांकां ४८०८ मतां मेळ्ळीं. कॉंग्रेसीचे वसंत नायक हांकां तिसर्या नंबराचीं ३०६५ मतां मेळ्ळीं. भाजपाक सोडचिठ्ठी दिवन वेंचणूक लढोवपी अच्च्युत नायक हांणीय दखल घेवपा इतलीं म्हळ्यार २०७८, तशेंच राजेश शेट्टी हांणीय ११६१ मतां मेळयलीं. सुनील गांवस हांकां चिखले पंचायतींतल्यान २८१९ मतां जाल्यार वसंत नायक १३७१ मतां मेळ्ळ्यांत. चिखलेचे सरपंच कमलाप्रसाद यादव हांणी बरीच मेहनत घेतिल्ली.
सुनील गांवस हांकां झरी, झुआरीनगर हांगा चड मतां मेळटलीं अशी शक्यताय उक्तायल्ली. मात हांगा मारियनो रॉड्रिग्ज हांकां २६१३ मतां जाल्यार गांवस हांकां २२३३ मतां मेळ्ळ्यांत. सांकवाळच्यान गांवस हांकां १६१६ जाल्यार मारियनो हांकां १५०८ मतां मेळ्ळीं. थंयचे थळावे अच्च्युत नायक हांकां १२१० मतां मेळ्ळीं. सुनील गांवस हांच्या मतांचेर अच्चुत नायक आनी राजेश शेट्टी हांच्या उमेदवारीचो परिणाम जाल्ल्याचें स्पश्ट जाल्ल्याची प्रतिक्रिया आयकूंक येताल्यो.
मर्सियना वाझ जैतिवंत
कुठ्ठाळेच्यान आमदार वाझ हांची घरकान्न मर्सियना वाझ जिखली. तांचे मुखार कॉंग्रेसीच्या सँड्रा रॉड्रिग्ज हांचें आव्हान आशिल्लें. हांगच्यान आरजीनूय अँजेलिन टेलीस हांकां उमेदवारी दिल्ली. सँड्रा रॉड्रिग्ज ही कोळसो आनी दोट्टीकरण रेल्वेमार्ग नाका ह्या प्रस्नाचेर वेंचणुकेंत देंविल्ल्यो. तशेंच तांकां अपेक्षे प्रमाण प्रतिसाद मेळूंक ना. मर्सियना वाझ हांकां ५२२४ जाल्यार सँड्रा रॉड्रिग्ज हांकां ३३६६ मतां मेळ्ळीं. अँजेलिन टेलिस हांकां १२५० मतां मेळ्ळीं. दोन फेर मतमेजणीत मर्सियना वाझ ह्यो दोनूय सुवातांचेर मुखार आशिल्ल्यो.
सुनील गांवस हांच्या जैता उपरांत मंत्री गुदिन्हो हांणी जैताचो हो वेग विधानसभा वेंचणुके मेरेन असोच उरतलो अशें सांगलें.
आमदार वाझ हांणी मर्सियना वाझ हांच्या जैताक लागून व्हड शक्त मेळिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
