भांगरभूंय | प्रतिनिधी
नवी दिल्ली, खबरां संस्था: भारतीय रेल्वेन पयसुल्ल्या अंतराच्या रेल्वे प्रवासा खातीर तिकेटीच्या भाड्यांत पुनर्रचना करपाचो निर्णय घेतला. ह्या नव्या बदलांक लागून पयसुल्ल्या अंतराच्या आनी विशिश्ट श्रेणीच्या रेल्वे भाड्यांत वाड जातली. जाल्यार दुसरे वटेन उणो अंतर आशिल्ल्या आनी उपनगरीय रेल्वे भाड्यांत कसलेच तरेचे बदल जावचे ना, अशेंय रेल्वेन सांगलें.
रेल्वे अधिकार्यांनी हे विशीं म्हायती दितना सांगलें, रेल्वे चलोवपाचो खर्च वाडिल्ल्यान खर्च आनी महसुलांत मेळ बसपा खातीर आनी प्रवाशांकूय सवाय भितर प्रवासाची सुविधा मेळचे खातीर ही दर वाड केल्या.
ल्हान अंतर आनी उपनगरीय रेल्वेची दर वाड ना
उपनगरीय रेल्वेच्या मासीक पासांत कसलेच तरेचे बदल करूंक ना. हाका लागून सदांच प्रवास करपी प्रवाशी समाधानी जाल्यात. तशेंच २१५ किमी मेरेनच्या प्रवासा खातीर सामान्य श्रेणीच्या तिकेटीं खातीर दर वाड करूंक ना.
रेल्वेन सांगलें, सदांच प्रवास करपी प्रवासी आनी उणें उत्पन्न आशिल्ल्या प्रवाशांक समाधानी करपा खातीर ही दरवाड करूंक ना.
लांब अंतराच्या तिकेटीच्या दरांत वाड
२१५ किमी परस चड आशिल्ल्या अंतराचेर धांवपी रेल्वेंत सामान्य श्रेणीचे तिकेटींत प्रती किलोमिटर १ पयशांची वाड केल्या. हाका लागून सामान्य श्रेणीच्या डब्यांतल्यान प्रवास करप्यां खातीर हें चड म्हारग पडचें ना, हाची जतनाय घेतल्या.
मेल आनी एसी एक्सप्रेस ट्रेनी खातीर दर किलोमिटर २ पयशांची वाड केल्या. एसी डब्यां खातीरूय २ पयशांची वाड केल्या.
रेल्वे अधिकार्यांनी दिल्ले म्हायती प्रमाण, नॉन एसी ट्रेनींतल्यान ५०० किमीचो प्रवास करपी प्रवाशाक फकत १० रुपया अदीक दिवचे पडटले.
येणावळ कितली मेळटली?
हे दर वाडींतल्यान रेल्वेक चालू अर्थीक वर्सांत ६०० कोटींची येणावळ मेळटली. रेल्वेन फुडें अशें म्हणलां, रेल्वे चलोवपाच्या खर्चांत फाटलीं कांय वर्सां बरीच वाड जाल्या. मनीसबळावेलो खर्च वाडून १.१५ लाख कोटींचेर गेला. जाल्यार पेन्शनाक वर्साक ६०,००० कोटी खर्च करचे पडटात. २०२४-२५ ह्या अर्थीक वर्सा वट्ट ऑपरेशनल खर्च २.६३ कोटींचेर पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
