भांगरभूंय | प्रतिनिधी
म्हापशें: ’बर्च बाय रोमिओ लेन’ क्लबा खातीर अबकारी (एक्साईज) परवानो मेळोवपा खातीर कांदोळी भलायकी केंद्राचो बनावट ना हरकत दाखलो वापरिल्ल्या प्रकरणांत म्हापशें पुलिसांनी ’जीएस हॉस्पिटॅलिटी’ हे लुथरा भावांचे कंपनी आड गुन्यांव दाखल केला. कांदोळी मुळाव्या भलायकी केंद्राचे अधिकारी डॉ. रोशन नाझारेथ हांणी हे विशीं कागाळ केल्या.
अशें आयलें उक्तडार
बर्च क्लबांतल्या उजो लागपाचे भिरांकूळ घडणुके उपरांत हणजूण पुलीस सौरभ लुथरा आनी गौरव लुथरा हांची नेटान चवकशी सुरू आसा. हे चवकशे मजगतीं, दुबावितांनी क्लबाच्या अबकारी परवान्या खातीर कांदोळे भलायकी केंद्राची एनओसी सादर केल्ली. पुलिसांनी ह्या दाखल्याचें व्हेरिफीकेशन भलायकी केंद्रा वरवीं केलें तेन्ना, अशे तरेचो कसलोच दाखलो केंद्रान केन्नाच जारी करूंक नाशिल्ल्याचें मुखार आयलें.
हे विशीं आनीक चवकशी करपा खातीर पुलिसांनी भलायकी केंद्राचे अधिकारी डॉ. नाझारेथ हांची जाप नोंद केली. संबंदीत एनओसीचेर डॉ. नाझारेथ हांची सय आनी शिक्को आशिल्लो. मात, आपणें असले तरेचो कसलोच दाखलो दिवंक ना आनी तो पुरायेन बनावट आशिल्ल्याचें डॉ. नाझारेथ हांणी स्पश्ट केलें. वरिश्ठांचे सुचवणे प्रमाण तांणी म्हापशें पुलीस स्टेशनांत कागाळ दाखल केली.
भलायकी केंद्राच्या मुखेल्यांनी बनावट सय आनी शिक्क्याचो गैरवापर करून प्रशासकीय यंत्रणेक फटयिल्ल्याच्या आरोपा खाला म्हापशें पुलिसांनी लुथरा भावांच्या कंपनी आड गुन्यांव नोंद केल्ल्यान मुखार तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
