भांगरभूंय | प्रतिनिधी
ह्या कायद्याक लागून रोजगाराची वैधानीक हमी 125 दिसां मेरेन वाडली
नियोजनाचे अधिकार ग्रामसभा आनी पंचायतीं कडेन
आधुनीक कायदेशीर रचणूक म्हूण हो कायदो मनरेगा 2005ची सुवात घेतलो
नवी दिल्ली : राष्ट्रपती द्रौपदी मुर्मू हांणी विकसीत भारत – रोजगार आनी उपजीविका मिशन (ग्रामीण) (व्हीबी-जी राम जी) विधेयक, 2025 मंजूर केला, जाका जी राम जी विधेयक अशेंय म्हणटात. ग्रामीण रोजगार धोरणाच्या परिवर्तनांत हो एक म्हत्वाचो मैलाचो पांवडो थारता. ह्या कायद्या खाला गांवगिऱ्या कुटुंबांक रोजगाराची वैधानीक हमी 125 दिसां मेरेन वाडयल्या, तशेंच ह्या कायद्या वरवीं सशक्तीकरण, समावेशक उदरगत, उदरगती कडेन संबंदीत उपक्रमांचें एकात्मीकरण आनी परिपूर्ण वितरण पद्दतीक चालना दिवपाचे यत्न केल्यात. हाका लागून समृध्द, सक्षम आनी आत्मनिर्भर ग्रामीण भारताची बुन्याद घटमूट जातली.
हाचे आदीं संसदेन विकसीत भारत – रोजगार आनी उपजीविका खातीर हमी मिशन (ग्रामीण) विधेयक, 2025 मंजूर केल्लें. हें विधेयक भारताच्या ग्रामीण रोजगार आनी उदरगतीच्या आंखणेंत निर्णायक सुदारणा थारल्या. आधुनीक कायदेशीर रचणूक म्हणून हो कायदो महात्मा गांधी राष्ट्रीय ग्रामीण रोजगार हमी कायदो (मनरेगा), 2005 ची सुवात घेतलो. ह्या कायद्या खाला उदरनिर्वाहाची सुरक्षा वाडयल्या आनी विकसीत भारत @2047 ह्या राष्ट्रीय संकल्पने प्रमाण ताची रचना केल्या.
सशक्तीकरण, वाड, एकात्मता आनी पूर्णताय ह्या तत्वांचेर आदारीत ह्या कायद्या खाला कल्याणकारी येवजणे वरवीं ग्रामीण रोजगाराक उदरगतीच्या एकवटीत साधनांत रुपांतरीत करपाचो यत्न केला. ह्या कायद्या वरवीं ग्रामीण कुटुंबां खातीर उत्पन्नाची सुरक्षा घटमूट जातली, प्रशासन आनी जापसालदारकी आधुनीक जातली आनी वेतन रोजगाराक तिगून उरपी आनी उत्पादक ग्रामीण मालमत्ता निर्माण करपा कडेन जोडटले, जाका लागून समृध्द ग्रामीण भारताची बुन्याद घाली.
ह्या कायद्या खाला अकुशळ शारिरीक काम करपाक तयार आशिल्ल्या दरेक गांवगिऱ्या घराब्याक दर अर्थीक वर्सा उण्यांत उणें 125 दीस रोजगाराची कायदेशीर हमी आसा. फाटल्या 100 दिसांच्या हमी परस ही वाड ग्रामीण कुटुंबांची उदरनिर्वाहाची सुरक्षा, कामाची उपलब्धता आनी उत्पन्नाची स्थिरताय घटमूट करता, तशेंच राष्ट्रीय उदरगतीक चड प्रभावीपणान आनी अर्थपूर्ण योगदान दिवपाक तांकां सशक्त करता.
ह्या कायद्या प्रमाण काम पुराय जाले उपरांत सप्तकी वा 15 दिसां भितर खंयचेय परिस्थितींत मजुरी दिवप सक्तीचें आसा. थारायिल्ल्या मुजती परस चड कळाव जालो जाल्यार अनुसूची-IIत सांगिल्ल्या तरतुदी प्रमाण कळाव जाल्ल्याची लुकसाण भरपाय दिवची पडटली, जाका लागून वेतनाची सुरक्षा आनीक घटमूट जातली आनी कामगारांच्या हिताची राखण जातली.
सगलीं कामां विकसीत ग्रामपंचायत येवजणे (व्हीजीपीपीएस) पसून सुरू जातात. ह्यो येवजण्यो ग्रामपंचायत पांवड्यार सहभागाच्या प्रक्रिये वरवीं तयार करतात आनी ग्रामसभेन मान्यताय दिल्या उपरांत तांची अंमलबजावणी करतात.
ह्यो येवजण्यो पीएम गति शक्ती सारकिल्ल्या राष्ट्रीय डिजिटल आनी भुगोलीक प्लॅटफॉर्मा कडेन जोडिल्ल्यो आसात, जाका लागून विकेंद्रित निर्णय घेवपाची प्रक्रिया सांबाळटना सरकाराच्या सगळ्या पांवड्यांचेर समन्वय सादपाक मेळटा.
बेरोजगारी भत्तो
ह्या कायद्यांतल्यो आदल्यो अपात्रतायेच्यो तरतुदी रद्द केल्यात आनी अर्थपूर्ण कायदेशीर संरक्षण म्हणून बेकारी भत्तो परतून सुरू केला. थारावीक काळांत रोजगार मेळना जाल्यार पंदरा दिसां उपरांत बेकारी भत्तो फारीक करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
