भांगरभूंय | प्रतिनिधी
म्हजो सामको लागींचो इश्ट आनी श्रीनागेश महारुद्र देवळाचे 2022 ते 2025 चे आदले समितींतले वांगडी सचीव प्रशांत अनंत शेणवी केरकार (पिराय 66, रा. फर्मागुडी, मूळ – केरी) हांकां मरण येवन आयज सोमारा बारा दीस जातात. ते नॅशनल इन्शुरन्स कंपनींतल्यान निवृत्त जाल्ले. तांच्या फाटल्यान घरकान्न शुभा उर्फ माया आनी दोन लग्न जाल्ल्यो चलयो आसात. ल्हान तेंपाच्या दुयेंसान तांकां आयिल्लें मरण आमकां सगल्यांक धक्को दिवन गेलें.
आयज ते आमचे मदीं नात, पूण दोळ्यां मुखार येता तें तांचें सतत धांवपळ करपी, मोगाळ, हांसरें रुप. तांणी आपल्या मोगाळ, मनमिळावू सभावान सगल्यांचीं मनां जिखून घेतिल्लीं. तांच्या वचपान नागेशीच्या धर्मीक, समाजीक जिवीतांत एक पोकळी निर्माण जाल्या. 2022 ते 2025 ह्या काळांत हांव श्रीनागेश महारुद्र देवळाच्या कार्यकारी समितींत अध्यक्ष म्हूण आशिल्लों. प्रशांत आमचो वांगडी. आमचे समितीन बरींच कामां केलीं. श्रीनागेशानूच आमकां हें करपाचें भाग्य दिलें. तातूंतलीं कामां सांगपाचीं जाल्यार, देवाचे पालखेची भोंवडी सौंदेकर राजवाड्या कडेन वता, थंय पेव्हर्स घालप, देवळा मुखार आशिल्ली पार्किंग वेवस्था सुटसुटीत करप, जाचें उक्तावण कैवल्य मठाधीश श्रीमद शिवानंद सरस्वती हांचे हस्तुकीं जाल्लें. नागेश देवस्थांत पाडव्या म्हुर्तार सुरू जाल्ली महाप्रसादाची सेवा, नागेश देवस्थानाचीं पंचिश्टां, श्री रवळनाथ आनी वेबातळ देवळांचो कळस घालप, नवो ट्रान्स्फोर्मर घालप, विजेची रोशणाय करप, पोरणे अग्रशाळेचें शिल्लक काम पूर्ण करप, देवळाची लालखी आनी अंबारी हाडप… हीं बरीचशीं कामां. तीं पूराय करपाक निश्ठावान, तळमळीचे काम करपी सहकाऱ्यांची गरज आशिल्ली. म्हजे समितींतल्या सगल्या वांगड्यांनी अपेक्षा पूर्ण केल्यो. तातूंतले एक तळमळीचे वांगडी म्हूण म्हाका प्रशांत केरकार हांचें नांव घेवचेंच पडटलें. आयज ते नात आनी तांची आयज रावन रावन याद येता.
प्रशांत केरकार हांची एक गजाल सांगतां. तांचो झाडां, रोपां, फुलांचे बागेचेर खूब मोग. तांणी आपलें पोरसूं मोगान जपिल्लें. आयज तांची बाग, तातूंतलीं फुलां, तांची याद काडटात आसतलीं. देव तांच्या दुख्खी कुटुंबाक हें भिरांकूळ दुख्ख सोंसपा खातीर बळगें दिवं अशी हांव श्रीनागेशा कडेन प्रार्थना करतां.
– दामोदर भाटकार, वेरें- बेतीं
आदले अध्यक्ष श्रीनागेश महारुद्र संस्थान, नागेशीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
