भांगरभूंय | प्रतिनिधी
चिंतन – 91
स्वहिताची चाड ते ऐका बोल ।
अवघेंचि मोल धीरा अंगीं ॥
तुकाराम महाराज म्हणटा – “जो कोण आपलें हित साध्य करपाक सोदता ताका मनशाचें खरें मोल म्हणल्यार ताचें धैर्य, धिटाय हें लक्षांत दवरचें.”
ल्हान पिरायेचेर मायभुंयेची सपन पळोवपी छत्रपती शिवाजी महाराज हे धैर्याचें मूर्त रूप. जायते दुस्मान, त्रास आनी भेदी — तरी तांणी हार मानली ना.
अफजलखानाक मेळपाक वतना मरण तांचे मुखार आसलें, पूण तांणी धैर्यपूर्ण निर्णय घेतलो. ती घडणूक फकत झुजाची कुशळटाय न्हय — ती आत्मविस्वास आनी धैर्याची परब आशिल्ली.
ताचें एक एक पावल म्हणटा – “भंयाचेर जैत मेळोवप हेंच स्वराज्याचें पयलें पावल.”
भुरगेपणांत दिश्टीहीन आनी आयकूंक येनाशिल्ली एक चली हेलन केलर जिवीतभर संवसाराच्या काळखांत आशिल्ली — पूण तिच्या काळजांतलो उजवाड कोणाकच पालोवपाक जमलो ना.
ती स्पर्श करून उतरां शिकलीं, हातांत उदकाचो थेंब घेतलो आनी पयलें उतर “उदक” वळखलें — त्याच खिणाक तिच्या जिविताक दिका मेळ्ळी.
तिणें सांगिल्लें, “संवसारांतल्यो सगळ्यांत सोबीत गजाली दोळ्यांनी दिसनात, त्यो काळजान जाणवतात.”
हें वाक्य तिच्या धिटायेचें प्रतिबिंब — कारण जंय हेरांक काळोख दिसलो थंय तिणें उजवाड सोदलो.
“धीरा अंगी मोल” हे ओळीची ती एक जिवी देख. संवसारभरांतल्या लाखांनी लोकांक हेलनाचें जिवीत एक व्हड आदर्शूच थारलें.
विज्ञानाच्या इतिहासांत मारी क्युरी हें नांव म्हणल्यार आडावंक शकना अशें धैर्य. त्या वेळार बायलांक प्रयोगशाळेंत काम करपाची संद मेळनाशिल्ली, पूण मारीन समाजांतलीं आडमेळीं मोडून उडयलीं.
रेडियम आनी पोलोनियम हे धातू तिणें सोदून काडले — त्या प्रयोगांनी तिचे भलायकेक लुकसाण जालें, पूण ती थांबली ना.
तिणें दोन फावटीं नोबॅल पुरस्कार मेळयलो आनी विज्ञानांत बायलां खातीर दार उक्तें केलें. ती म्हणटाली, “जिणेंत केन्नाच खंयचेच गजालीक भियेवं नाकात — फकत ती समजून घेवपाक जाय.”
तुकाराम महाराजांची ही ओळ आयज लेगीत लागू जाता.
“स्वहिताची चाड” म्हणल्यार फकत स्वताचो फायदो सोदप न्हय — पूण आपलें खरें बरें तें वळखप. आनी तें बरें खंय मेळटा? धीराच्या मुळाक.
शिवाजी महाराजान शौर्यांतल्यान स्वराज्य बांदलें, मारी क्युरीन विखापसून उजवाड निर्माण केलो आनी हेलन केलराक काळखांतल्यान उतरां सोदलीं — तांचें सगळ्यांचें मोल एकूच आशिल्लें — धैर्य, धीर, धिटाय.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
