भांगरभूंय | प्रतिनिधी
ज्येश्ठ नागरिकान केली मुंबय उच्च न्यायालयाच्या गोवा खंडपीठांत याचिका दाखल
पणजी: पोरबावाडो-कळंगूटेचे एके इमारतींत हॉटेल सुरू केल्ल्यान आनी थंय अग्निसुरक्षेचे नेम पाळिनाशिल्ल्याचो दावो करीत एका ज्येश्ठ नागरिकान मुंबय उच्च न्यायालयाच्या गोवा खंडपीठांत याचिका दाखल केली. हाची गंभीर दखल घेवन न्यायालयान उजो पालोवपी दळ आनी सरकाराक याचिकादारान हाजीर केल्ल्या मुद्यांचेर बेगोबेग कारवाय करपाचे निर्देश दिल्यात. न्या. सारंग कोतवाल आनी न्या. आशिष चव्हाण हांच्या खंडपीठान हो आदेश दिला.
ह्या प्रकरणांत डॉ. बेंजामीन ब्रागांझा ह्या ज्येश्ठ नागरिकान याचिका दाखल केल्या. तांणी राज्य सरकार, बार्देश उपनगर नियोजक, कळंगुट ग्रामपंचायत, उजो पालोवपी दळ, बार्देस उपजिल्लोधिकारी, पर्यटन खातें, कळंगुट पुलीस, जीकेपी रिअल इस्टेट डेव्हलपर आनी हेरांक प्रतिवादी केल्यात.
याचिकादार पोरबावाडो – कळंगुटेच्या ’पालमारिन्हा कॉम्प्लेक्स’च्या एका फ्लॅटाचे सह-धनी आसात. इमारतीचे तिसरे माळयेर बेकायदेशीर आडमेळीं पयस करपाक तांणी ही याचिका केल्या. संबंदीत इमारतींत तांचो येवपा-वचपाचो मार्ग आनी पर्यायी जिन्या मेरेनचो प्रवेश आडयिल्ल्याचो तांचो दावो आसा. दुसरे आनी चोवथे माळयेर बेकायदेशीर गेट्स आनी आडमेळीं पयस करपाची मागणीय तांणी केल्या. इमारतीचो काय भाग वेवसायीक वापरा खातीर घेतिल्ल्यान अग्निसुरक्षेशी तडजोड केल्ल्याचें याचिकेंत म्हणलां. हे विशीं जायते फावटीं संबंदीत यंत्रणांकडेन कागाळ करूनय कारवाय जावंक नाशिल्ल्यान ते निमाणे न्यायालयांत गेले.
न्यायालयात याचिकादारा वतीन ऍड. जोएल पिंटो हांणी युक्तिवाद केलो. संबंदीत बिल्डर इमारतीच्या व्हडल्या भागांत रिसॉर्ट चलयिल्ल्यान, बेकायदेशीर आडमेळ्यांक लागून ’गोंय इमारत नेम २०१०’ मोडला. नेमा प्रमाण, इमारतींतल्यान भायर सरपाचे सगळे मार्ग आनी जिने आडमेळ्यां बगर आसप सक्तीचें आसा. अग्निशमन सेवा, पंचायत आनी नगर नियोजकांनी हे सुवातेची जोड पळोवणी करून अहवाल सादर करचो, अशी मागणी केल्या. न्यायालयान सगल्या प्रतिवादींक नोटिसो जारी केल्यात, ह्या प्रकरणाची फुडली सुनावणी ६ जानेवारी २०२६ दिसा निश्चीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
