भांगरभूंय | प्रतिनिधी
पणजी : मडगांवच्या खारेबांध रेल्वे उड्डाणपुला लागसार काल मध्यान रातीं उसरां एके वेगान आशिल्ले गाडयेन रस्त्या कुशीक उबीं आशिल्ल्या वाहनांक नेटान धपको दिलो. रवीराज कॅफे लागसार घडिल्ली ही घडणूक सीसीटीव्ही कॅमेर्यांत कैद जाली, ह्या अपघातांत वाहनांचें व्हडा प्रमाणाचेर लुकसाण जालां.
हे विशीं मेळिल्ले म्हायती प्रमाण, मध्यरातींच्या सुमाराक एक गाडी खारेबांध उड्डाणपुलावेल्यान सामकी वेगान येताली. चालकाचें नियंत्रण सुटिल्ल्यान ह्या वेगान आशिल्ले गाडयेन रस्त्याचे कुशीक आशिल्ल्या पार्क केल्ल्या वाहनांक एका फाटल्यान एक धपको दिलो. हातूंत खुबश्या गाडयांचीं लुकसाण जालें. ही घडणूक मध्यान रातीं घडिल्ल्यान रस्तयर गाडयो उण्यो आशिल्ल्यो, ना जाल्यार व्हड घडणूक घडटली आशिल्ली.
ह्या अपघाताची सीसीटीव्ही फुटेज आतां मुखार आयल्या, तातूंत गाडयेचो वेग आनी धपक्याचो नेट स्पश्टपणान दिसता. अपघाता उपरांत ह्या वाठारांत बोवाळ निमारण जाल्लो. थळाव्या पुलिसांनी घडणुके सुवातेर वचून पंचनामो केलो. हो अपघात सोर्याच्या नेटार गाडी चलयिल्ल्यान जाला काय हेर तांत्रीक इबाडाक लागून जाला, हाचो तपास मडगांव पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
