भांगरभूंय | प्रतिनिधी
नवी दिल्ली, खबरां संस्था: १६ डिसेंबराक मथुरेंत दाट धुक्याक लागून सकाळीं साडेतीन वरांचेर एक भिरांकूळ अपघात जालो, जातूंत ८ बसी आनी ३ गाडयो एकमेकांचेर आदळ्ळ्यो. ह्या अपघातांत १३ लोकांक मरण आयलें. जाल्यार ७० लोक जखमी जाले. हाच्या २ दिसां आदीं, १४ डिसेंबराक धुक्याक लागून दृश्यमानता उणी जाल्ल्यान यूपी-हरियाणांत २० रस्ते अपघात जाल्ले, हातूंत ८० गाडयांचो धपको बसलो आनी १२ लोकांक मरण आयलें.
शिंयांत धुक्याक लागून गाडी चलयतना आडखळी येतात. हाका लागून रस्ते अपघात वाडटात. भारत सरकाराचे आंकडेवारी प्रमाण, २०२२ त धुक्याक लागून आनी धुल्लाक लागून ३४,२६२ रस्ते अपघात जाले, जाल्यार २०२१ त हो आंकडो २८,९३४ आशिल्लो.
भारतीय हवामान विभागान उत्तर, वायव्य आनी लागसारच्या खुबश्या भागांनी फुडल्या कांय दिसां खातीर दाट धुक्याची शिटकावणी दिल्या.
शिंयाच्या दिसांनी रस्तो अपघात कित्याक वाडटात?
शिंयाच्या दिसांनी धुकें आनी थंड वार्याक लागून दृश्यमानता आनी गाडयेवेलें नियंत्रण दोनूय उणें जाता. चालकाक मुखारचो रस्तो सारको दिसना आनी गाडयेक वेळार योग्य ब्रेक लागना. हाका लागूनच ह्या हंगामांत रस्ते अपघात वेगान वाडटात.
शिंयाच्या दिसांनी रस्तो अपघात वाडपाचीं कारणां
दाट धुक्याक लागून रस्तो आनी हेर वाहनां दिसनात.
रस्त्यार धुकें आनी दंव पडिल्ल्यान निसरप जाता.
हाका लागून ब्रेक उसरां लागतात, गाडी निसरता.
उणे दृश्यमानतेंत ओव्हरटेकिंग करतना चुको जातात.
हाय-बीम लायटीक लागून दृश्यमानता आनीक उणी जाता.
गाडयेंत फॉग लायट वा इंडिकेटर वेवस्थीत नाशिल्ल्यान समस्या निर्माण जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
