आशावादी प्रकाशनाचो रुप्या उत्सव आनी पयणारीचो दशमानोत्सव

भांगरभूंय | प्रतिनिधी

शैलेंद्र मेहताक पयलो स. डेनिस डिकुन्हा पुरस्कार

पणजी ः कुवेटांत 2000 वर्सा सुरु जाल्ल्या ’आशावादी प्रकाशन’ चो रुप्या उत्सव, तशेंच 2015 वर्सा मुंबंय सुरवात जाल्ल्या पयणारी .कॉम ह्या तीन लिपींच्या कोंकणी साहित्यिक वेब सायटीचो दशमानोत्सव हालींच मंगळूरच्या एम. सी . सी . बँकेच्या पी. एफ. एक्स. सभांगणांत मनयलो. बस्ती वामन शेणय स्मारक 25 कोंकणी पुस्तकांचें लोकार्पण, मौल्याधारित कोंकणी पत्रिकेचो पुरस्कार तशेंच साहित्य, कला, रंग्‌मंच, भरतनाट्य, समाजसेवाह्या मळांचेर वावर केल्ल्यांचो भौमान, कन्नड लिपियेंत लिपियंतरण जाल्ल्या कोंकणी पुस्तकाचो स. डेनिस डिकुन्हा स्मारक पयलो पुरस्कार आनी आशावादी लिपियंतरण पुस्तक पुरस्कार ह्या वेळार दिले .
सुत्रसंचालक लॉरेन्स विनोद बार्बोजा शिर्वा हाणें आपले प्रस्तावनेंत फाटल्या 25 वर्सांनी आशावादी प्रकाशनान साहित्य प्रकाशना वांगडाच, साहित्यिक चर्चा, साहित्यिक सर्ती, अध्ययन कार्यशाळा अशो साबार कार्यावळी घडोवन हाडल्यात देखून नवे पिळगेक कोंकणीत बरोवपाची प्रेरणा मेळ्ळ्या, अशें सांगलें.
मानादिक रोनाल्ड प्रकाश डिसोझा अजेकार हाणें कार्यावळीचें उक्तावण केलें. आशावादी प्रकाशनचो स्थापक तशेंच पयणारी.कॉमचो संपादक वल्ली क्वाड्रस अजेकार हाणें येवकाराचें उलवप केलें, नामनेचो कोंकणी कवी अँड्र्यू एल. डिकुन्हान आशावादी प्रकाशनाची 25 वर्सांची वाट ह्या विशयाचेर सविस्तर म्हायती दिली. मेल्विन डिकुन्हान ’पयणारी दशमानोत्सवाच्या खास अंकाचें लोकार्पण केलें. ह्या वेळार मुखेल सोयरे विश्व कोंकणी केंद्राचे नंदगोपाल शेणय, डॉ. चंद्रलेखा डिसोझा, कोरिन रास्किन्हा वेदिचेर उपस्थित आशिल्लीं.
क्लारा अरुण डिकुन्हा (समाज सॆवा), इवेट रेमोना परेरा (भरतनाट्य), रोहित सांक्तुस (समाज सॆवा), क्रिस्तोफर डिसोझा नीनासम (रंग्‌मंच), विल्सन डिसोझा कय्यार (कला), ग्लेनिश मार्टिस अलंगार (साहित्य), बर्नाड जे कॉस्ता कुंदापुर (नाटक आनी डिजिटल पत्रिका) हांचो शाल, यादिस्तिकआनी मानपत्र दिवन सन्मान केलो. आविल रस्कीन्हा हाका डॉ. चंद्रलेखा डिसोझा आनी फादर चेतन लोबो हांचे हस्तुकीं पत्रकारितेच्या मळावयलो जिणे गौरव पुरस्कार दिलो त्याच वेळार ‘पावसा थेंबे’ ह्या तिच्या तिसऱ्या कवितासंग्रहाचें लोकार्पण जालें.

बस्ती वामन शेणय स्मारक पुस्तकांचे लोकार्पण
फुडल्या सत्रांत बस्ती वामन शेणय स्मारक 25 कोंकणी पुस्तकांचें लोकार्पण जालें. त्या सत्राचें सूत्रसंचालन अरुण डिसोझा अजेकार हाणें केलें. ह्या वेळार स. डेनिस डिकुन्हा स्मारक आशावादी लिपियंतरण पुरस्कार ‘निर्वासित यात्रिची भोवंडी’ ह्या कवितासंग्रहा खातीर नामनेचो कवी शैलेंद्र मेहताक कवी मेल्विन रॉड्रिग्स आनी फ्रान्सिस डिकुन्हा हांचे हस्तुकीं दिलो. शाल, मानपत्र, यादिस्तिक आनी 25 हजार रुपया अशें ह्या पुरस्काराचें स्वरूप आशिल्लें. ह्या वेळार शैलेंद्र मेह्तान आपले विचार व्यक्त केले.
ह्या सुवाळ्याक अनिल लोबो पेर्माय, डॉ. एड्वर्ड एल. नाझरेथ, जुलियाना वेगस, एच एम पेर्नाल, विन्सी क्वाड्रस, जॊ क्वाड्रस संतेकट्टे, आल्विन सेरावो, एच. आर. आळ्व, कॉन्सेप्टा फर्नांडिस, व्हायोलेट जे. परेरा, उर्जिता भोबे, सुव्रत भोबे, मच्चा मिलार, मारियेट रस्कीन्हा, डेविड डिसोझा अजेकार, जॉन पेर्मन्नूर, विल्फ्रेड लोबो पडील हांचे सयत अनेक साहित्यमोगी हाजीर आशिल्ले. प्रिया सिक्वॆरा फेरार, जेस्सी लोबो कुल्शॆकर हाणीं हि कार्यावळ घडोवन हाडूंक हातभार लायलो.