भांगरभूंय | प्रतिनिधी
पणजे पारो 18 अंशाचेर
भांगरभूंय । प्रतिनिधी
पणजी : गोंयांत फाटल्या कांय दिसां सावन तापमानांतले वाडी वांगडाच कुडकुड्याचें शीं लेगीत अणभवपाक मेळटा.
शेनवारा पणजे 18 अंश सेल्सियस उण्यांत उण्या दुसऱ्या तापमानाची नोंद जाली. हें 2025 तलें पणजेचें सगल्यांत उणें तापमान थारलें. हाचे आदीं पणजे उण्यांत उणें 17.5 अंश सेल्सियस तापमानाची नोंद जाल्ली. हवामान खात्यान फुडले स दीस गोंयांतलें उण्यांत उणें तापमान 18 ते 20 अंश सेल्सियस मेरेन आसतलें, अशी शक्यताय उक्तायल्या.
शेनवारा मुरगांवां लेगीत उण्यांत उणें तापमान 18 अंश सेल्सियस नोंद जालें. गोंयांत 21 ते 26 डिसेंबर ह्या काळांत कांय वाठारांनी फांतोडेर मध्यम स्वरुपाचें धुकें पडपाची शक्यताय आसा. ह्या काळांत गोंयांत चडांत चड तापमान 31 ते 33 अंश सेल्सियस मेरेन आसतलें. शेनवारा पणजे 31.5 अंश जाल्यार मुरगांवां 31.6 अंश सेल्सियस चडांत चड तापमानाची नोंद जाली. गोंयांत सध्या रातचें आनी फांतोडेर खर शीं जाणवता. फांतोडेर कांय कडेन धुकें पडटा, सकाळीं थंड वाऱ्याची झुळूक अणभवपाक मेळटा. मात दनपार उपरांत वताची रखरख वाडटा. गोंयांत डिसेंबरांतलें उण्यांत उणें तापमान सादारणपणान 20 ते 22 अंश हाचे मदीं आसता, मात फाटल्या कांय दिसांनी उण्यांत उणें तापमान सरासरी परस 1.5 ते 3.9 अंशान उणें नोंद जालां. डिसेंबरांत गोंयांतलें उण्यांत उणें तापमान सरासरी परस उणें आसतलें, अशी शक्यताय हवामान खात्यान हे आदींच उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
