सुरिंदर कुमार खोसला आड ब्ल्यू कॉर्नर नोटीस

भांगरभूंय | प्रतिनिधी

बर्च प्रकरण; अजय गुप्ता, भरत कोहलीच्या जामीन अर्जाचेर फाल्यां सुनावणी

भांगरभूंय । प्रतिनिधी

म्हापशें : हडफडेंच्या बर्च बाय रोमियो लेन क्लब दुर्घटणा प्रकरणांत गोंय पुलिसांनी क्लबाचे मालमत्तेचे कथीत धनी सुरिंदर कुमार खोसला हाचे आड इंटरपोला वतीन ब्ल्यू कॉर्नर नोटीस जारी करपाची प्रक्रिया सुरू केल्या. हाचे आदींच खोसला हाचे आड पुलिसांनी लूक आवट नोटीस जारी केल्या. जाल्यार दुबावीत अजय गुप्ता आनी भरत कोहली हांच्या जामीन अर्जाचेर सोमारा म्हापशें न्यायालयांत सुनावणी जातली.

हे दुर्घटणेंत दुबावितां मदलो खोसला हो एक दुबावीत आसा. क्लबांत घडिल्ल्या उजो दुर्घटणेच्या दुसऱ्या दिसा दुबावीत सुरिंदर कुमार खोसला हो यूके (ब्रिटन) गेल्लो. यूकेचें नागरिकत्व ताचे कडेन आसा. ह्या प्रकरणांत चवकशी खातीर सुरिंदर कुमार खोसला हो हणजूणें पुलिशेक जाय. ताका लागून ताचे आड इंटरपोला वतीन ब्ल्यू कॉर्नर नोटीस जारी करपाची प्रक्रिया चालू आसा आनी बेगिनूच ही नोटीस जारी करतले, अशी म्हायती पुलिशे कडल्यान मेळ्ळ्या.

ह्या प्रकरणांत क्लबाच्या तिनूय धनयां सयत क्लबाचे मुखेली आनी वेवस्थापक अश्या आठ जाणांक पुलिसांनी अटक केल्या. खोसला हो ते मालमत्तेचे कथीत धनी. सध्या ह्या वादग्रस्त मालमत्तेचो ताबो ताचेच कडेन आसा. गुन्यांवाच्या तपासाचे नदरेन खोसला हाची चवकशी खुबूच म्हत्वाची मानतात. ताची उपस्थिती निश्चीत करचे खातीर आनी दुबाविताक सोदून ताका भारतांत हाडपा खातीर पुलिसांनी कायदेशीर मार्ग आपणायला.

मजगतीं, हे दुर्घटणेंत 25 निश्पाप लोकांक मरण आयलां, जाल्यार स जाण जखमी जाल्यात. पुलिसांक तपासांत मजत जातली हे खातीर गुन्यांवकारांची वळख, तांची रावपाची सुवात आनी तांचे हालचाली विशीं म्हायती एकठांय करप, अश्या उद्देशान ब्ल्यू कॉर्नर नोटीस जारी करतात. गुन्यांवकाराक देशा भायर पळून वचपा पसून आडावप आनी संबंदिताच्या आंतरराष्ट्रीय पांवड्याचेर कारवाय करचे खातीर ही नोटीस वापरतात.

बर्च दुर्घटणेंत हाचे आदीं क्लब धनी सौरभ लुथरा आनी गौरव लुथरा ह्या भावां आड पुलिसांनी ब्ल्यू कॉर्नर नोटीस जारी करून तांकां थायलॅण्ड सावन भारतांत हाडिल्ले. क्लबाचे जोडधनी अजय गुप्ता आनी रोमियो लेनचे गोंय मुखेली भरत कोहली हांच्या जामीन अर्जाचेर शेनवारा म्हापशें अतिरिक्त न्यायालयांत सुनावणी जाली. हणजूणें पुलिसांनी जिल्हो पंचायत वेंचणुकेंत व्यस्त आशिल्ल्याचें कारण दिवन आपलें म्हणणें सादर करपाक आनी युक्तीवादा खातीर अतिरिक्त वेळ दिवपाची विनवणी न्यायालया कडेन केली. ताका लागून ही सुनावणी सोमारा 22 डिसेंबरा मेरेन तहकूब केल्या.