भांगरभूंय | प्रतिनिधी
गुवाहटी, खबरां संस्थाः मिझोरामांतल्या सैरांग सावन नवी दिल्लीक वचपी राजधानी एक्सप्रेस रेल्वेचो धपको लागिल्ल्यान आठ हतयांक मरण आयलें. एक हती गंभीर जखमी जाला.
ही घडणूक आसामाच्या होजाई जिल्ह्यांत घडली. गुवाहटी सावन 126 किमी अंतराचेर सकाळीं सुमार 2 वरांचेर हतयांचो कळप रेल्वेमार्ग हुंपता आसतना हो अपघात जालो. हयताच्या कळपाक धपको दिल्ल्यान रेल्वेचें इंजिन आनी पांच डबे रेल्वे ट्रॅका वयल्यान देंवले. ह्या अपघातांत रेलवेंत आशिल्ल्या प्रवाशांक कांय जावंक ना.
हेल्पलायन नंबर जारी
ह्या अपघातांत खंयचोच प्रवासी जखमी जावंक ना. तशेंच रेल्वे प्रवाशांच्या मजती खातीर हेल्पलायन क्रमांक जारी केलां अशें रेल्वेचे मुखेल जनसंपर्क अधिकारी कपिंजल किशोर शर्मा हांणी सांगलें. अपघाताची म्हायती मेळटकूच रेल्वे अधिकारी मजती खातीर घडणूक सुवातेर धांवले. रेल्वेच्या ट्रॅका वयल्यान भायर पडिल्ल्या डब्यांतल्या प्रवाशांक हेर डब्यांनी बसपाक सुवात दिली. तशेंच सकाळीं 6 वरांचेर ही रेल्वे गुवाहटीक वचपाक भायर सरली. गुवाहटींत हे रेल्वेक आनीक डबे जोडटले. प्रवाशांच्या सोयी खातीर गुवाहटी रेल्वे स्टेशनान हेल्पलायन क्रमांक जारी केल्यात. मजगतीं, अपघाता उपरांत कांय काळ रेल्वे सेवा बंद उरली. कांय रेल्वेमार्गांचेय मार्ग बदलले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
