भांगरभूंय | प्रतिनिधी
नवी दिल्ली, खबरां संस्थाः भारतांत शस्त्रांचो परवानो मेळोवप हें शस्त्र कायदो, 1959 आनी तातूंतल्या तरतुदींक लागून कठीण आसा. शस्त्रांचो परवानो फकत स्वताची राखण, नेमबाजी खेळ आनी पिकाची राखण करपा खातीर दितात. देखून भारतांत अधिकृतपणान शस्त्रां आशिल्ल्या लोकांचो आंकडो मर्यादीत आसा.
केंद्रीय गृह खातें वा राष्ट्रीय गुन्यांव नोंद ब्युरो (NCRB) कडेन चालू वर्स 2025 वा 2024 वर्सा देशांतल्या कितल्या लोकां कडेन शस्त्रांचो परवानो आसा हाचो डेटा ना. तांचे कडेन 2016-17 वर्साचो डेटा आसा. म्हायती हक्क आनी वेगवेगळ्या राज्यांनी 2023 मेरेन आपल्या पांवड्यार एकठांय केल्ल्या म्हायतीचेर आदारीत नवीन आंकडेवारी मुखार मेळ्ळां.
मेळिल्ले म्हायती प्रमाण, सध्या भारतांत 33 ते 40 लाख सक्रीय शस्त्रां परवाने आसात. उत्तरेकडल्या राज्यांनी आनी केंद्रशासित प्रदेशांत सगळ्यांत चड शस्त्रांचो परवानो आसा. लोकसंख्या, इतिहासीक आनी संस्कृतीक कारणांक लागून हो आंकडो चड आसा.
सगळ्यांत चड शस्त्रांचो परवानो आशिल्ल्या राज्यांची वळेरी
उत्तर प्रदेश – सुमार 13 लाख परवाने आसात. (2016 मेरेन 12.77 लाख आनी मागीर 2023 वर्साच्या अहवाला प्रमाण 13.29 लाख मेरेन वाड) आत्मरक्षणाक लागून हो आंकडो वाडलो.
जम्मू आनी काश्मीर – 4 ते 5 लाखांच्या घरांत सक्रिय परवाने.
पंजाब – 3.46 ते 3.60 लाख परवाने आसपाची शक्यताय. लश्करी फाटभूंय आनी व्हड शेतकी क्षेत्राक लागून शस्त्रांची मगणी.
मध्य प्रदेश – सुमार 2.5 लाख सक्रिय परवाने.
हरियाणा – 1.4 ते 1.5 लाख परवाने.
राजस्थान – 1.3 ते 1.4 लाख परवाने.
हिमाचल प्रदेश – 77 हजार सक्रिय परवाने. मालमत्ता आनी रानवटी जनावरां कडल्यान राखण करपा खातीर परवाने घेतल्यात.
महाराष्ट्र – राज्यांत 84 हजार ते 1 लाख परवाने आसपाची शक्यताय.
दक्षीण राज्यांनी पिस्तूल परवान्यांचो आंकडो उणो
उत्तर राज्यां परस दक्षिण भारतांतल्या राज्यांनी बंदूक परवान्यांचो आंकडो उणो आसा. आंध्र प्रदेश, कर्नाटक, केरळ, तमिळनाडू आनी तेलंगना हांगा 2 लाखां परस उणे परवाने आसात. भारतांत दर शंबर लोकां फाटल्यान सुमार 5 पिस्तुला आसात. संवसारीक सरासरी परस हें प्रमाण खूब उणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
