भांगरभूंय | प्रतिनिधी
८ लाख ६९ हजार ३५६ मतदार थारायतले २२६ उमेदवारांचो फुडार
पणजी : उत्तर आनी दक्षीण गोंय मेळून जिल्लो पंचायतीच्या ५० मतदारसंघां खातीर फाल्यां शेनवारा २० डिसेंबर तारखेर मतदान जातलें. मतपत्रिकेच्या आधारार सकाळीं ८ ते सांजेवेळार ५ वरां मेरेन मतदान जातलें. दोनूय जिल्लो पंचायतींत मेळून २२६ उमेदवार आखाड्यांत देंवल्यात. मतदारांचो आंकडो ८ लाख ६९ हजार ३५६ आसा. उत्तर गोंयत १११ , जाल्यार दक्षीण गोंयांत ११५ उमेदवार आसात.
जाहीर प्रचार बिरेस्तारा सकाळीं सोंपले उपरांत मतदानाच्या आदल्या दिसा उमेदवारांनी मतदारांच्यो वयक्तीक भेटी घेवपाचेर भर दिली. प्रचारा वेळार खंयसरूच वाद आनी हिंसक घडणुको घडूंक ना. शुक्रारा मतदान केंद्रांचेर मतपत्रिका तशेंच हेर सामान धाडपाचें काम चालूच आशिल्लें. कसलीय अनुचित घडणूक घडची न्हय म्हणून सगल्या मतदान केंद्रांचेर पुलीस बंदोबस्त आसतलो. ह्या वेळार चडशे उमेदवार नवे आशिल्ल्यान निकालाचो अदमास सांगप कठीण आसा. सध्याच्या वांगड्यांचे चडशे मतदारसंघ बायलां खातीर वा हेर मागासवर्गीयां खातीर राखीव जाल्ल्यान सध्याच्या वांगड्यांक उमेदवारी सादर करपाक मेळूंक ना. तरी ९ आतांचे वांगडी वेंचणुकेच्या मैदानार आसात. तशेंच फाटले फावटीचे (२०२०) १२ उमेदवार ह्या वेळार परत वेंचणूक मैदानार देंवल्यात.
भाजपन ४० जाल्यार मगोने ३ मतदारसंघांत उमेदवार उबे केल्यात. हेर ७ सुवातांचेर अपक्षांक फाटबळ दिलां. कॉंग्रेस, गोवा फॉरवर्ड, आरजी आनी आपचे उमेदवार मैदानार देंवल्यात. फाल्यां २० तारखेर मतदान जाले उपरांत सोमारा २२ तारखेर मतमेजणी जातली. म्हालाचे सुवातेर मतमोजणी जातली.
……..
उत्तर गोंय
मतदारसंघ : २५
मतदार : ४४०१९९
दादले : २१३७०४
बायलो : २२६४९२
मतदान केंद्रां : ६५८
वट्ट उमेदवार : १११
……
दक्षीण गोंय
मतदारसंघ : २५
मतदार : ४२९१५७
दादले : २०६९०२
बायलो : २२२२५३
मतदान केंद्रां : ६२६
वट्ट उमेदवार:११५
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
