भांगरभूंय | प्रतिनिधी
भौशीक बांदकाम मंत्र्यां हस्तुकीं तिरंगो हुबयलो
मडगांव: मडगांवच्या माथानी साल्डाना प्रशासकीय संकुलांत आयोजीत जिल्लो पांवड्यावयल्या गोंय मुक्ती दीस सुवाळ्याक भौशीक बांदकाम मंत्री दिगंबर कामत हांणी राष्ट्रीय तिरंगो बावटो हुबयलो.
सुरवातेक दक्षीण गोंय जिल्लोधिकारी एग्ना क्लिटस आनी दक्षीण गोंय पुलीस अधिक्षक टिकम सिंग वर्मा हांणी सुवाळ्याच्या थळार मंत्र्यांक येवकार दिलो. मंत्री कामत हांणी राष्ट्रीय तिरंगो बावटो हुबोवन मानवंदना दिली आनी पुलीस पंगडाच्या संचलनाची पळोवणी केली.
संचलनांत पुलीस आनी होमगार्ड पंगडा सयत सरकारी हायस्कूल, वालकिणी-सांगें, पीएम नवोदय विद्यालय, काणकोण, सरकारी हायस्कूल, आंबावली काणकोण, सेंट एन्थनी हायस्कूल, गालजिबाग, रोझरी कॉन्वेंट हायस्कूल, नुवें आनी अवर लेटी ऑफ हेल्थ हायस्कूल, कुंकळ्ळीच्या विद्यार्थ्यांनी संचलनांत भाग घेतलो. ह्या वेळार विद्यार्थ्यांनी साबार सांस्कृतीक कार्यावळ सादर केले.
आमदार आलेक्स रेजिनाल्ड लॉरेन्स, अतिरिक्त जिल्हाधिकारी श्रीनेत कोठवाळे, रमेश गांवकार, आदले खासदार एदुआर्द फालेरो, सुटके झुजारी, विद्यार्थ्यी, नागरीक आनी सरकारी अधिकारी सुवाळ्याक उपस्थित आशिल्लें.
अनिल पै हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
