भांगरभूंय | प्रतिनिधी
पणजी : गोंयांत सध्या नातलांची नेटान तयारी सुरू आसा. बाजारूय बरेच सजल्या. नातलांचें सामान विकत घेवपाक बाजारांनी गर्दी पळोवपाक मेळटा. जायते तरेचे गोड जिन्नस, मांसाहारी जिन्नसांची हे परबेक मागणी आसता. मात, म्हारगाय वाडिल्ल्यान बोल्साक कांतर लागिल्ल्याचो सूर उक्तायतना दिसता.
थळाव्या बाजारांनी भोंवले उपरांत म्हारगायेची चर्चा आयकूंक मेळटा. मांस, चिकनाचें दर वाडलां. फाटल्या डिसेंबराचे तुळेंत बॉयलर चिकनाचे दर सुमार २० टक्के वाडल्यात. मांसाचे दर वाडिल्ल्याचें मुखेल कारण म्हणल्यार येरादारी खर्च आनी जायते फावटीं वेपारीय संद येता ती सोडिनात अशें लोकांचें म्हणणें आसा. नातलां निमतान जायते जिन्नस, मिठाय करपा खातीर लागपी तांतयां १०० रुपया डझन जाल्यांत. नातलांचे जिन्नस तयार करपा खातीर चड वापरपी गांवठी तांतयां २०० रुपयां परस चड दरांत विकतात. म्हळ्यार दर दुपेटीन वाडलां.
मजगतीं, नातलां आनीक लागीं येतां येतां नातलांक लागपी सामानाचें दर वाडिल्ल्याची शक्यताय उक्तायता. गोंयचें जेवण आनी नातलांची मिठाय, गोड जिन्नस करपाक वापरपी नाल्लूय म्हारग जाला. फाटल्या वर्सा २५ ते ३० रुपयांनी नाल्ल मेळटालो. मात, आतां तो गुणवत्ता आनी आकारा प्रमाण ताचें दर ५० रुपयां परस चड जालां. नातलांची मिठाय आनी जेवण करपा खातीर खुबशे नाल्ल लागतात. नाल्लाक चड पयशे मेजचे पडटात.
गोंयांत नाल्ल आतां ‘लक्झरी’ वस्तू जायत चलिल्ल्याची प्रतिक्रिया लोक फकांडांनी उक्त्तायतना दिसतात. दोस, दोदोल, बेबिंकां, नेवर्यो अशे तरेचे खावपाचे जिन्नस करपा खातीर परंपरीक खावपाचे जिन्नस करपा खातीर तांतयां, साखर, मैदो आनी नाल्लाची गरज आसता. मात, म्हारगाय वाडिल्ल्यान जेवणाचे जिन्नस कशे करचे, हो प्रस्न सामान्यांक पडला. वाडपी म्हारगायेंत खर्चाक कात्री लावपा बगर पर्याय नाशिल्ल्याच्यो प्रतिक्रिया उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
