भांगरभूंय | प्रतिनिधी
मुख्यमंत्री ज्ञानपर्व येवजणे खाला जातल्यो नेमणुको
पणजी : राज्यांत राष्ट्रीय शिक्षण धोरणाच्या प्रभावी कार्यवाये खातीर सगळे थराचेर कंत्राटी पद्धतीचेर १००८ शिक्षक आनी ३७७ इन्स्ट्रक्टर मेळून १३८५ कर्मचार्यांची नेमणूक जातली. ह्यो नेमणुको सर्व शिक्षा अभियाना खाला जातल्यो. राष्ट्रीय शिक्षण धोरणाच्या प्रभावी कार्यवाये खातीर शिक्षण खात्यान मुख्यमंत्री ज्ञानपर्व येवजण अधिसूचीत केल्या. सरकारी तशेंच अनुदानीत संस्थां खातीर येवजण लागू जातली.
राज्यांत पांवड्या पांवड्यान राष्ट्रीय शिक्षण धोरणाची कार्यवाय सुरू जाल्या. फावंडेशन, प्रीपेरेटरी, मीडल आनी सेकंडरी अशे चार पांवडे (बारावी मेरेन) आसा. विशय तशेंच वरां वाडिल्ल्यान आनीक शिक्षकांची आवश्यकता आसा. संगीत, चित्रकला अशा एनएसक्यूएफ विशयां खातीर शीक्षक तशेच इन्स्ट्रक्टरांची गरज आसा. शिक्षकांचो उणाव पयस करपा खातीर मुख्यमंत्री ज्ञानपर्व येवजणे खाला कंत्राटी पद्दतीचेर शिक्षक तशेंच इन्स्ट्रक्टरांची भरती जातली. शिक्षणीक पात्रताय, पगार, भरतीची पद्दत हे येवजणे खाला निश्चीत केल्या.
फावंडेशन आनी प्रीपेरेटरी (फाऊंडेशन ते पाचवी मेरेन) पावंड्या खातीर ६००, माध्यमीक स्तरा खातीर (सवी ते आठवी मेरेन) ५८ आनी उच्च माध्यमीक (णवी ते बारावी मेरेन) ३५० मेळून १००८ शिक्षकांची नेमणूक जातली. तशेच कला विशयां खातीर ३०० जाल्यार एनएसक्यूएफ विशयां खातीर ७७ मेळोन ३७७ इनस्ट्रक्टरांची नेमणूक जातली.
ही नेमणूक कंत्राटी पद्दतीचेर आसतली. खयच्याय स्थितीत शिक्षकांक सेवेत कायम केले वचचे ना. शिक्षक/इन्स्ट्रक्टर कायमस्वरूपी नोकरे खातीर दावो करचे नात, अशें प्रतिज्ञापत्र तांका सादर करचे पडटले. नेमणूक ५ वर्सांखातीर आसतली. शिक्षक तशेच इनस्ट्रक्टरांक सुर्वेक २० हजार रूपया पगार आसतलो. वर्सागणीक पगारात ३ टक्के वाड जातली. सलग पाच वर्सांच्या सेवे उपरांत पगार ५ हजार रूपया वाडटलो. फुडल्या ५ वर्सांच्या सेवे उपरांत पगार आनीक ५ हजार वाडटलो. शिक्षक, इन्स्ट्रक्टरांच्या कामगिरीचो नियाळ जातलो. कामगिरी प्रमाण पगार वाडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
