भांगरभूंय | प्रतिनिधी
पणजी : स्मार्ट सिटी मिशना खाला १ डिसेंबर २०२५चे निमाणे कडेन पणजेंतले ९२.१५ टक्के प्रकल्प पुराय जाल्यात. जाल्यार पणजी सोडल्यार देशांतल्या हेर स्मार्ट सिटींतले ९६ टक्के प्रकल्प पुराय जाल्यात. केंद्रीय गृहनिर्माण आनी नागरी कामकाज खात्याचे राज्यमंत्री तोखन साहू हांणी लोकसभेंत दिल्ले लेखी जापे वरवीं ही म्हायती मेळ्ळी. हे विशीं खासदार सयानी घोष हांणी अतारांकित प्रस्न विचारिल्लो.
जापे प्रमाण, स्मार्ट सिटी खाला पणजे वट्ट ५१ प्रकल्प मंजूर केल्ले. हातुंतल्या ४७ प्रकल्पांचें काम पुराय जालां. जाल्यार ४ प्रकल्पांचें काम सध्या सुरू आसा. ह्या ५१ प्रकल्पां खातीर १०५१ कोटी रुपया निधी मंजूर केल्लो. पुराय जाल्ल्या ४७ प्रकल्पां खातीर १०१४ कोटी रुपया खर्च जाले. जाल्यार कामां सुरू आशिल्ल्या ४ प्रकल्पां खातीर ३७ कोटी रुपय निधी मंजूर केला.
जापेंत म्हणलां, स्मार्ट सिटी मिशना खाला देशभरच्या १०० शारांनी ८०६४ प्रकल्प मंजूर जाल्ले. हाका लागून वट्ट १.६४ लाख कोटी रुपया मंजूर केले. हातुंतले १.५५ लाख कोटी रुपयांचे ७७४१ प्रकल्प पुराय जाल्यात. जाल्यार सध्या ३२३ प्रकल्पांचें काम सुरू आसा. हाका लागून ९४२५ कोटी रुपया मंजूर केल्यात. स्मार्ट सिटी मिशनाक ३१ मार्च २०२५ मेरेन मुजतवाड दिली.
उरिल्लीं कामां डिसेंबर २०२५ मेरेन पुराय करात
स्मार्ट सिटी मिशनाची निमाणी मुजत ३१ मार्च २०२५ मेरेन आशिल्ली. हे विशीं खात्यान सगल्या राज्य सरकारांक कळयिल्लें. ह्या वेळार कांय प्रकल्प अंमलबजावणीच्या विवीध टप्प्यांत आशिल्ले. हे खातीर तयार केल्ल्या स्पेशल पर्पज व्हेइकलाक (एसपीव्ही) उरिल्लीं कामां डिसेंबर २०२५ पयलीं पुराय करपाची सुचवणी खात्या वतीन दिल्या, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
