भांगरभूंय | प्रतिनिधी
मनोहर पर्रीकार विज्ञान महोत्सवाचें जालें उक्तावण
पणजी : राज्य सरकारा वतीन आयोजीत केल्ल्या मनोहर पर्रीकर विज्ञान महोत्सवाक लागून विद्यार्थ्यांक प्रेरणा मेळटली. विज्ञान हो विशय फकत पाठ्यपुस्तक वा प्रयोगशाळे पुरतो मर्यादीत ना हें ह्या महोत्सवाक लागून समजून येतलें अशें मुख्यमंत्री डॉ. प्रमोद सावंत हांणी म्हणलें. बिरेस्तारा पणजे महोत्सवाच्या सातव्या आवृत्तीच्या उक्तावणा वेळार ते उलयताले.
ह्या वेळार डॉ. अनिल काकोडकार, डॉ. सुनील सिंग हाजीर आशिल्ले. ह्या वेळार साई गौतम गोपाळ कृष्णन हांकां मनोहर पर्रीकर युवा शास्त्रज्ञ पुरस्कार भेटयलो.
महोत्सवाक लागून राज्यांत वैज्ञानीक दृश्टीकोन वाडपाक मजत जातली. महोत्सवांत १८ सुवातांचेर १९ शास्त्रज्ञ दोन हजारां परस चड विद्यार्थ्यां कडे संवाद सादतले. हाका लागून विद्यार्थ्यांक ह्या मळावेली नवी संकल्पना, संशोधन, शास्त्रज्ञांक तांच्या प्रयोगात आयिल्ल्यो समस्या, ताचेर काडिल्ले उपाय अश्या खुबश्या गजालींची म्हायती मेळटली. तांकां ह्या मळार उपलब्ध आशिल्ली नवी संद समजतली. ह्या संवादान विद्यार्थ्यांमदीं विज्ञान ह्या विशया विशीं उत्सुकताय वाडटली, अशें मुख्यमंत्र्यानी सांगलें.
विज्ञानाक लागून समाजांतल्या दरेका मळावेल्या समस्यांचेर उपाय काडूं येता. विद्यार्थ्यांनी ह्या मळार कसलोच दुबाव दवरिनासतना काम करचें. शिक्षकांनीय विद्यार्थ्यां मदीं उत्सुकताय कायम उरचे खातीर काम करचें. गोंय जरी ल्हान राज्य आसलें तरी हांगा राष्ट्रीय पांवड्यार विवीध शिक्षण तशेंच संशोधन संस्था आसात. तशेंच फाटलीं कांय वर्सां सावन गोंयांत नव्यो शिक्षण संस्था उब्यो रावल्यात. थळाव्या विद्यार्थ्यांनी अशे तरेच्या सगल्या संस्थांतल्यान मेळपी विज्ञानाचो फायदो घेवपाक जाय, अशें मुख्यमंत्र्यानी म्हणलें.
विज्ञानाक जिणेंतलो भाग करात
डॉ. अनिल काकोडकार हांणी सांगलें, हो महोत्सव गोंयच्या फुडारा खातीर उपेगी थारतलो. हाका लागून शास्त्रज्ञ आनी तरणाटे पिळगे मदीं संवाद जातलो. तरणाट्यांनी आपल्या देशांतली समस्या जाणून ताची जाप विज्ञानांतल्यान सोदून काडची. विज्ञानाक आपले जिणेंतलो एक भाग करून ताचे वरवीं देशाक मुखार व्हरपा खातीर यत्न करचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
