भांगरभूंय | प्रतिनिधी
ते विशींचे कसले पुरावे पुलिसांक मेळटात, ताचेर फुडल्या तपासाची दिशा थारतली.
हणजूणेंच्या बर्च बाय रोमियो लेन क्लबाच्या धनयांक, सौरभ आनी गौरव लुथरा हांकां गोंयांत हाडल्यात. पांच दिसांची पुलीस कोठी दिल्या. आतां ह्या तपासाक वेग येतलो, अशी आस्त बरेच गोंयकार बाळगून आसात. तळघरांतले रांदचेकुडींत धुंवरांत घुस्मटिल्ल्यान कांय कामगार आनी पर्यटक मेळून 25 जाणांक मरण आयिल्लें. गोंयच्या इतिहासांतली भिरांकूळ घडणूक. संवसारभर ती गाजली. ताचो परिणाम गोंयच्या पर्यटनाचेर जावपाची भिरांत आशिल्ली. आतां फुडल्या 15 दिसांत कितले देशी, विदेशी पर्यटक गोंयांत येतात, ताचेर पर्यटनाक कितलो धपको बसला तें स्पश्ट जातलें. कारण ह्या म्हायती तंत्रज्ञानाच्या काळांत कसलीय गजाल रोखडीच सगल्याक पावता. तातूंत गोंयची बदनामी करपी बरेच जाण सोशल मिडियाचेर आसात. ते स्वता जावन हें करतात, काय कोणी तांकां पेरल्यात? बदनामी करपा फाटलें कारण कितें? खोलायेन चवकशी जाल्यार हाचेर उजवाड पडटलो. तें कितेंय आसलें तरी दुर्घटणे प्रमाण हाचोय पर्यटन मळाक मार बसला हें मान्य करचेंच पडटलें.
लुथरा भावांचीं देशा सयत पुराय संवसारांत हाॅटेल, पब, कल्बांची सांखळ आसा. म्हणटकच तांचो सकयल सावन वयर मेरेन संपर्क आसतलो. हणजूण्यां नायट क्लबाक उजो लागतकच पांच वरां भितर तांणी पळ काडलो, म्हणटकच तांची यंत्रणा कितली वेगवान आसा, हें कळटा. ते मेळ्ळे, तें बरें जालें. लंडनाक गेल्ले जाल्यार धरपाक अडचणीं येवपाच्यो. चवकशेंत ते नेमकीं कोणाचीं नांवां घेतात, ते विशींचे कसले पुरावे पुलिसांक मेळटात, ताचेर फुडल्या तपासाची दिशा थारतली. परवाने वा हेर कितें घेवपाक ते स्वता गेल्ले काय तांच्या अधिकाऱ्यांनी सगले ‘सोपस्कार’ करून ते घेतिल्ले (काय घेवंकूच नाशिल्ले!), तेंय कळटलें. तपासांत कर्मचारी, अधिकाऱ्यांचीच नांवां येतात काय आनीक कोणाचीं ताचे कडेन गोंयकारांचें लक्ष आसतलें. ह्या प्रकरणाक लागून आतां सरकारी यंत्रणां पर्यटन मळा वयले गैरप्रकार, बेकायदेशीर गजाली बंद करपाक पेंगट बांदून वावराक लागल्यात. पर्यटन मळ नितळ जालेंच जाल्यार परत थंय गोंयाक नखलामी करपी कांयच घडचें ना, हाची जतनाय घेवची पडटली.
हणजूणें घडणुके उपरांत कॅमेऱ्या मुखार उलयतना, आमी हो क्लब मोडपाचो आदेश दिल्लो, अशें सरपंचान सांगलां. कांय पंचायती बेकायदेशीर कामांक नोटिशी धाडटात. मात तांकां पंचायत संचलनालयांत संबंदीत धनी आव्हान दिता. म्हणटकच नोटिशींक स्थगिती मेळटा. बऱ्याच प्रकरणांची अजून सुनावणी चालू आसा खंय. ताका लागून बेकायदो बांदकामांचेर कारवाय करपाक मेळूंक ना. फाटल्या स वर्सांत 2394 नोटिशींक आव्हान दिल्ल्याचीय म्हायती मेळ्ळ्या. प्रकरण आडकून उरिल्ल्यान पंचायतींक मुखार कांयच पावलां उबारपाक मेळूंक नात. संचालनालयांत 7- 8 वर्सां फक्त संचालक आशिल्ली, पूण अतिरिक्त संचालक नाशिल्ले, अशी म्हायतीय उक्तडार आयल्या. तिका कामाचें वजें जालां आसूं येता. पयलीं दोन अधिकारी त्या जाग्यांचेर आसतना, तांची बदली कोणें आनी कित्याक केली, तें जाणून घेवपाचो अधिकार गोंयकारांक ना? 2018 ते 2025 ह्या काळांत कसल्यो नोटिशी, आदेश भितर- भायर सरल्यात, तें पळोवंक जाय. आतां लुथरा भावांचे जबानीचेर ह्या प्रकरणांक मोडण मेळूंक शकता.
खण उद्देग बंद आशिल्ल्यान पर्यटन मळ सांबाळून दवरूंक जाय. तें वाडोवपाक जाय. ते नदरेन येत्न जातात, पूण असलें कितें तरी घडटा आनी त्या येत्नांक आडमेळीं येतात. नेमकें पर्यटन मोसमांत हें घडलां. हाचो वायट संदेश मागीर भायर पावता. आयच्या काळांत तो आडावप शक्य ना. देखून पयलींच सादुरताय बागळून पावलां उबारचीं. भाव सांपडले, गैरप्रकार करपी बरेच साव आसतले, तांचोय सोद घेवप पर्यटन मळाकूच फायद्याचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
