लुथरा भावांक हाडले गोंयांत

भांगरभूंय | प्रतिनिधी

पणजी : हडफडेंच्या ‘बर्च बाय रोमिओ लेन’ क्लबाक लागिल्ल्या भिरांकूळ उज्याच्या प्रकरणांतले मुखेल दुबावीत गौरव आनी सौरभ लुथरा ह्या दोगांकूय घेवन गोंय पुलिसांचो पंगड दिल्लीच्यान विमानान बुधवारा सकाळीं ११ वरांचेर गोंयच्या मोपा विमानतळार दाखल जाले. ह्य वेळार विमानतळार व्हडा प्रमाणांत पुलीस बंदोबस्त आशिल्लो. तांकां आतां हणजूण पुलीस स्टेशनांत हाजीर केले. चवकशे उपरांत तांकां म्हापशेंच्या न्यायालयांत सादर करतले. हणजूण पुलीस स्टेशना भायर खर बंदोबस्त दवरला.
दिल्लीच्या पतियाळा हाऊस न्यायालयान मंगळारा सांजेवेळार लुथरा भावांक दोन दिसांची ट्रान्झिट रिमांड मंजूर केली. वैजकी तपासणी पुराय जाले उपरांत तांकां गोंयांत हाडपाची प्रक्रिया सुरू केली. गोंयांत पावले उपरांत तांकां म्हापशेंच्या न्यायदंडाधिकार्‍यां मुखार हजर करतले. गोंय पुलिसांनी तांचेर सदोश मनीस बळी हाचे सयत विवीध गुन्यांव दाखल केल्यात, हाचे पयलीं तांचे अटकपूर्व जामीन अर्ज न्यायालयान भायर मारिल्ले.
ह्या प्रकरणां आतां मेरेन पुलिसांनी अजय गुप्ता, राजीव मोडक, प्रियांशू ठाकूर, राजवीर सिंघानिया, विवेक सिंग आनी भारत कोहली ह्या हेर वांगड्यां अटक केल्या. उजो लागलो तेन्ना क्लबांत १५० परस चड पर्यटक हाजीर आशिल्ले. ह्या प्रकरणाचो खोलायेन तपास सुरू आशिल्ल्यान लुथरा भावांच्या अटकेक लागून आतां खुबश्यो धक्को दिवपी मुखार येवपाची शक्यताय आसा.

आयज लुथरा भावांक हाडले गोंयांत
आयज सकाळीं लुथरा भाव मोपा विमानतळार पावले. थंयच्यान गौरव आनी सौरभ लुथरा हांकां घेवन पुलीस हणजूण पुलीस स्टेशनांत पावले. हाका लागून पुलीस स्टेशन वाठारांत खर सुरक्षा वेवस्था तैनात केल्ली. हणजूण पुलीस स्टेशनावेल्यान लुथरा भावांक वैजकी तपासणी खातीर शिवोले भलायकी मुळाव्या केंद्रांत दाखल केले.थंयच्यान तांकां उत्तर गोंय जिल्लो हॉस्पिटलांत हालयले. तांची वैजकी तपासणी पराय जाले उपरांत पुलीस बंदखणी खातीर तांकां आयज न्यायालयांत हजर करतले.

मुख्यमंत्र्यांची प्रतिक्रिया
पेडण्यां झेडपी वेंचणुकेंत उबे रावल्ल्या उमेदवारांच्या प्रचारा खातीर आयिल्ल्या मुख्यमंत्र्यांक पत्रकारांनी लुथरा भावां विशीं प्रस्न विचारले तेन्ना, तांणी कसलेच तरेची प्रक्रिया दिवंक ना. तांणी उलोवपाक न्हयकार दिलो.