भांगरभूंय | प्रतिनिधी
पणजी : फाटल्या कांय वर्सांनी भाजप सरकारान गोंयची नासाडी केल्या. हाका लागून जनता तिडकल्या. येवपी जिल्लो पंचायत वेंचणुकेंत मतदार मतांतल्यान आपली तिडक उक्तावन भाजपाक तांचो जागो दाखोवन दितले अशें कॉंग्रेस प्रदेशाध्यक्ष अमित पाटकार हांणी म्हणलें. बुधवारा पणजे जाल्ले पत्रकार परिशदेंत ते उलयताले. ह्या वेळार गोवा प्रभारी माणिकराव ठाकरे, सहप्रभारी डॉ. अंजली निंबाळकर हाजीर आशिल्ले.
पाटकार हांणी सांगलें, सध्या आमी घराघरांनी वचून प्रचार करतात. ह्या वेळार जनता भाजपाच्या कामांचेर खुश नाशिल्ल्याचें समजता. ही गजाल भाजपाच्या फुडार्यांकूय समजल्या. तांच्या पांयां पोंदची जमीन हाल्ल्या. हाका लागूनच पयलेच फावट राज्याचे मुख्यमंत्री जिल्लो पंचायत वेंचणुके खातीर घराघरांनी वचून प्रचार करतात. कांय सुवातांचेर मतदारांक हांयस दिवपाचें काम सुरू आसा. अशें जरी आसलें तरी हे वेंचणुकेंत कॉंग्रेसीकूच येस मेळटलें.
तांणी म्हणलें, वेंचणुकेंत कॉंग्रेस पक्ष ३६ जाल्यार गोवा फॉरवर्ड ९ सुवातांचे लढटात. आमी ५ अपक्षांक तेंको दितले. दोनूय जिल्ह्यांनी आमचेच युतीक येस मेळटलें अशी आमची खात्री आसा. केंद्रान राज्यांतल्या पंचायतींक ३६८ कोटी रुपया निधी मंजूर केल्लो. मात राज्य सरकारान निधी वापर प्रमाणपत्र आनी हेर कागदपत्रां दिवंक नाशिल्ल्यान हातुंतलो १५२ कोटी निधी एकठांय करून दवरला. हाचे वेल्यानूच राज्य सरकार थळाव्या स्वराज्य संस्थां विशीं गंभीर ना हें समजता.
आप मतां फोडटा
आम आदमी पक्ष आनी आरजीपी आपूण भाजपा आड आशिल्ल्याचें सांगतात. मात फाटले कांय दीस ते फकत कॉंग्रेस पक्षाचेरूच टिका करतात. अरविंद केजरीवाल हांणीय कॉंग्रेसीकूच लक्ष्य केलें. आप भाजप विरोधांतलीं मतां फोडपाचें काम करतात. सध्या फकत कॉंग्रेसूच भाजपा आड लढटा, अशें पाटकार हांणी म्हणलें.
पक्षाच्या अध्यक्षांनी सांबाळून उलोवचें
जिल्लो पंचायत वेंचणुकेंत कांय सुवातां विशीं आरजीपी फुडारी बेजारिल्ले. आमी तांचे कडेन संपर्क करपाचो यत्न केलो. मात तांणी प्रतिसाद दिवंक ना. पक्षाच्या अध्यक्षांनी जापसालदारकेन वक्तव्य करप गरजेचें. भाजप सगल्या मळांचेर अपेशी थारलां. हाचो राग जनता मतदानांतल्यान दाखोवन दितली अशें माणिकराव ठाकरे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
