भांगरभूंय | प्रतिनिधी
पीएम सूर्य घर येवजणे खाला जालां शक्यः श्रीपाद नायक
पणजीः गोंयांतल्या सुमार 800 घराब्यांचें लायटीचें बील शुन्य येता. पीएम सूर्य घर मुफ्त बीजली येवजणे खाला हे घराबे स्वता आपली वीज तयार करून भायल्यान येवपी विजेचेर निंबून रावचे बंद केल्ल्या कारणान हें शक्य जालां. हे येवजणे खाला 8 कोटी इतली सबसिडी लावार्थ्यांक फावो जाल्या अशी म्हायती केंद्रीय वीज राज्यमंत्री श्रीपाद नायक हांणी राज्यसभेचे लेखी जापेंत दिल्या.
राज्यसभेच्या पटलार म्हायती दितना नायक हांणी सांगलें, राबितो वाठारांत घरा वयर सोलर यंत्रणा बसोवपा खातीर भारत सरकारान प्रधानमंत्री सूर्य घर मुफ्त बीजली येवजण फेब्रुवारी 2024त चालीक लायल्ली. सोलर यंत्रणा बसोवपाक लावार्थ्यांक अर्थीक फायदो आनी अनुकूल असो खर्च जावपा खातीर केंद्रीय अर्थीक सहाय्य तशेंच तारण मुक्त रीण 5.75 टक्के जुरा सयत दिता.
गोंयांत आतां मेरेन 1,596 घराब्यांनी हे येवजणे खाला लाव घेवन सोलर यंत्रणे वरवीं वीज तयार करतात. तातूंतल्या 50 टक्के लावार्थ्यांनी सरकारी विजेचेर निंबून रावचे बंद करून आपल्या घरांत तयार केल्ली वीज वापरतात देखून 798 जाणांक शुन्य विजेचें बील येता.
हे येवजणे खाला 1,596 मदल्या 69 टक्के म्हळ्यार 1,110 लावार्थ्यांक केंद्रांतल्यान अनुदान मान्य जावन 8.78 कोटी इतलें अनुदान मेळ्ळां. जाल्यार 264 जाणांनी रिणाची येवजण घेवन ही सोलर यंत्रणा विकती घेतल्या.
शुन्य बीला येवपी घराब्यां विशीं गोंय राज्य, हिमाचल प्रदेश, झारखंड, कर्नाटक आनी अस्तंत बंगाल ह्या व्हडल्या राज्यां परस खूब फुडें आसा. देखीक शेजाराच्या कर्नाटक राज्यांत फक्त 245 घराब्यांक शुन्य लायटीचें बील येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
