भांगरभूंय | प्रतिनिधी
न्यायालयान जनहीत याचिका
पणजी : रोमिओ लेनच्या नायट क्लबाक उजो लागून २५ जाणांक मरण आयलें. हे घडणुकेची चवकशी न्यायालयाचे देखरेखी खाला विशेश तपास पंगडा वरवीं (एसआयटी) करची, अशी मागणी करपी जनहित याचिका गोंयच्या मुंबय उच्च न्यायालयान स्वेच्छा याचिकेक जोडली. ह्या प्रकरणाची फुडली सुनावणी १२ जानेवारी २०२६ दिसा जातली.
ऐश्वर्या साळगांवकार हांणी ही जनहीत याचिका दाखल केल्या. तातूंत तांणी राज्य सरकार, हडफडें- नागोवा पंचायत, जिल्लोधिकारी कार्यालय, गोंय राज्य प्रदूशण नियंत्रण मंडळ, पंचायत संचालनालय, गोंय दर्यादेग क्षेत्रीय वेवस्थापन प्राधिकरण, नगर नियोजन खातें, बिईंग एफएस पॅसिफिक हॉस्पिटॅलिटी प्रा. लि. आनी हेरांक प्रतिवादी केल्या.
हडफडेंच्या बर्च बाय रोमिओ लेन क्लबांत ६ आनी ७ डिसेंबर २०२५ चे मध्यान रातीं भिरांकूळ अग्निकांडात पंचवीस जाणांक मरण आयलें. ह्या उज्याची चवकशी सध्या उत्तर गोंय जिल्लोधिकारी अंकित यादव हांचे अध्यक्षते खाला चवकशी समिती सुरु आसा. हाचे मजगतीं प्रदीप घाडी आमोणकार आनी सुनील दिवकार हांणी उच्च न्यायालयांत याचिका दाखल केली. तातूंत तांणी वयले घडणुकेची म्हायती दिवन संबंधितांचेर कारवाय करपाची मागणी केली. याचिकादारां वतीन ऍड. रोहित ब्राझ डिसा हांणी वयले घडणुकेची म्हायती दिवन संबंदीत क्लबाक कशे तरेन अभय दिलें, हाची म्हायती दिली. तशेंच वयलें क्लब मातयेभरवण करपी आदेशाक पंचायत संचालनालयान स्थगीती दिल्ली. अश्या आदेशा उपरांत अवैध बांधकामांत वेवसाच चालूच आशिल्ल्याची म्हायती दिली. हाची दखल घेवन न्यायालयान स्वेच्छा दखल घेतली. तशेंच ऍड. रोहित ब्राझ डिसा हांकां अमिकस क्यूरी म्हणून नियुक्ती केली. ह्या प्रकरणाची फुडली सुनावणी १२ जानेवारी २०२६ दिसा दवरल्या.हाचे मजगतीं वयले जनहित याचिकेची सुनावणी मंगळारा जाली तेन्ना, याचिकादारा वतीन ऍड. गौरिष अग्नी हांणी वयल्या मुद्याची म्हायती न्यायालयाक दिली. तशेंच एकूच विशय आशिल्ल्याचें सांगलेंे. उपरांत न्यायालयान वयली याचिका स्वेच्छा जनहित याचिकेक जोडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
