भांगरभूंय | प्रतिनिधी
भारतीय नागरी सेवा आनी संरक्षण सेवा आमकां वाडपाक, साहस करपाक आनी राष्ट्राची सेवा करपाची संद दिता.
अामचे शांतीनगर फोंडेंचे विंग कमांडर राहुल प्रदीप वेरेकार हांणी भारतीय वायुसेनेंत विशिश्ट कारकीर्द केल्या. पायलट म्हूण ताणें ऑपरेशन्स, प्रशिक्षण, आनी आयएएफचें मिशन सांबाळपाक म्हत्वाचें योगदान दिलां. राहूल हो म्हजो इश्ट प्रदिप वेरेंकार हांचो चलो. ल्हानपणा सावन हांवें ताका पळयला.
1985 इस्वेंत गोंय मुक्ती दिसा ताचो जल्म जालो. ताचो शिक्षणीक प्रवास बरोच प्रभावी जाला, सेंट मेरी हायस्कुल फोंडें थावन आरआयटी इंजिनियरिंग कॉलेज मेरेन. भारतीय वायू सेनेची कँपस मुलाखत आनी थंय सावन वायूसेनेंत पार्ट म्हूण भरती. ताणें वायुसेनेच्या पायनियरिंगाच्या फ्लायिंग ब्रांचांत पयलो शॉर्ट सर्विस कमिशन फॉर मेन म्हणून आपली सुवात मेळयल्या आनी वायुसेना अकादेमींतल्या देड वर्सांचें खर प्रशिक्षण घेतलां.
जून 2009 इस्वेंत तो वायू सेनेंत अधिकारी म्हण कमिशन जाल्लो — तेन्नाच ताचो खरो प्रवास. 7 वर्सां त्या हेवी लिफ्ट येरादारी विमानांक फ्लॉगिंग करपाक लागलो, आनी मागीर वायुसेना अकादेमींत पात्र उड्डाण प्रशिक्षक (क्यूएफआय) म्हूण ताची निवड जावप ही एक व्हडली गजाल.
एएफएस तांबराम, चेन्नयची फ्लायिंग इंस्ट्रक्टर शाळा ही एक आदरणीय संस्था, आनी थंयचो प्रशिक्षक आशिल्ल्यान ताणें प्रशिक्षकांक आकार दिला जे’ परतून भारतीय विमाननाच्या फुडाराक आकार दितले. हीवूय खऱ्यांनीच व्हड गजाल. तो आयएएफ, आयएन, आयसीजी, आनी भारतीय सैन्याच्या ऑपरेशनल पायलटांक प्रशिक्षण दितालो — ती एक व्हड जापसालदारकी आशिल्ली. आयएएफचो उंचेलो दर्जो तिगोवन दवरपाक ताणें खूब मोलाचो वांटो घेतला.
एकंदरीत विंग कमांडर राहुल हांचो हो एक अविश्वसनीय प्रवास. इंजिनीयरीग शिकताना घडये ताणें विचार करुंकच नासतलो की ताची जीण वायूसेनें मेरेन वचत. पूण हें नशिब केन्ना खंय पावयता तेंच कळना. भारतीय वायुसेनेंत (आयएएफ) 14 वर्सां अल्प सेवा अधिकारी म्हण काम केलें, आनी वरिश्ठ अधिकाऱ्यां कडल्यान तोखणाय मेळप हें ताच्या समर्पणाची गवाय. ताका दक्षिण हवाई कमांडाच्या हवाई अधिकारी कमांडिंग इन चीफ कडल्यान आदर्श सेवे खातीर आनी मुखेल सेनापती अंदमान निकोबार कमांडाची तोखणाय मेळ्ळी.
लश्करी विमान येरादारींतल्यान वेपारी कॉकपिटांत वचप हें ल्हान संक्रमण न्हय. एअर इंडिया एक्सप्रेस बोईंग 737 विमान उड्डाण करपाक संक्रमण करप हें एक उल्लेखनीय कामगिरी. भारतीय वायुसेनेचो पायलट (आयएएफ) जावपा पसून नागरी विमान कंपनीं खातीर उड्डाण करपांत संक्रमण करपाक वेगवेगळ्या कार्यावळीच्या वातावरणाक, नेमांक आनी विमानांक अनुकूल जावप गरजेचें आसता.
आयएएफांतल्या ताच्या अणभवाक लागून ताका हे भुमिके खातीर बरी तयारी करची पडल्या. नव्या आव्हानाक अनुकूल जाल्ल्यान आनी तातूंत उत्कृश्ट कामगिरी केल्ल्या खातीर ताका परबी. एअर इंडिया एक्सप्रेस आपली विमानां वाडयता, तातूंत आनीक बोईंग 737 मॅक्स विमानां जोडपाची येवजण आसा. विमान कंपनी वाडटा आनी नवी संद निर्माण करता तें पळोवप रोमांचक.
विंग कमांडर राहुल हांचीं उतरां गोंयच्या तरणाट्यांक जागृताय करपी. भारतीय नागरी सेवा आनी संरक्षण सेवा आमकां वाडपाक, साहस करपाक आनी राष्ट्राची सेवा करपाची संद दिता अशें तो म्हणटा. ह्या मळां कडेन संपर्क सादप खऱ्या अर्थान जिवीत बदलपी आसूं येता. गोंयच्या तरणाट्यांनी हाचो सोद घेवचो, व्हड सपन पळोवचें अशें ते सांगतात.
जॉन आगियार
9822159705
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
