भांगरभूंय | प्रतिनिधी
मुख्यमंत्र्यां हस्तुकीं उक्तावण; महोत्सव 18 डिसेंबराक दोना पावला
पणजीः विज्ञान, तंत्रगिन्यान आनी कोयर वेवस्थापन खातें 7वो मनोहर पर्रीकार विज्ञान महोत्सव 18 डिसेंबराक मनयतलें. हे कार्यावळींत इस्रोचे आदले अध्यक्ष डॉ. आलुरू सीलीन किरण कुमार हे बीज भाशण करतले. तशेंच अणू उर्जा आयोगाचे आदले अध्यक्ष डॉ. अनील काकोडकार आनी आयआयएसी बंगळुरूचे डॉ. साई गौतम गोपाळकृष्णन हे पॅनल चर्चेंत वांटेकार जातले. गोपाळ कृष्णन हांकां मनोहर पर्रीकार युवा वैज्ञानीक पुरस्कारान भोवमानीत करतले अशी म्हायती महोत्सव समितीचे अध्यक्ष जुझे नरोन्हा हांणी दिली.
पर्वरे सचिवालयांत जाल्ले पत्रकार परिशदेंत जुझे नरोन्हा उलयताले. ह्या वेळार विज्ञान, तंत्रगिन्यान आनी कोयर वेवस्थापन खात्याचे संचालक हरीश अडकोणकार हजर आसले.
विद्यार्थ्यां मदीं उत्सुकताय आनी वैज्ञानीक प्रवृत्ती घडोवन हाडपा खातीर मनोहर पर्रीकार विज्ञान महोत्सव हो वैज्ञानीक महोत्सवाची रचना केल्या, अशें अडकोणकार हांणी सांगलें.
ह्या महोत्सवांत देशभरांतल्यान नामनेचे वैज्ञानीक, संशोधक आनी युवा प्रतिभा एकठांय येवन परस्पर संवादीत व्याख्यान आनी आकर्शक वैज्ञानीक प्रवचना वरवीं फुडले पिगळेक प्रोत्साहन दितले. गोंयचे आदले मुख्यमंत्री आनी संरक्षण मंत्री तशेंच आयआयटी मुंबय पदवुत्तर मनोहर पर्रीकार हांच्या दायजाचो भोवमान ह्या महोत्सवात करता अशें अडकोणकार हांणी सांगलें.
ह्या कार्यावळीचें उक्तावण मुख्यमंत्री डॉ. प्रमोद सावंत हांचें हस्तुकीं एनआयओ दोना पावल हांगासर जावन हे कार्यावळीचें लायव्ह स्ट्रिमींग हेर णव थळांनी जातलें. ह्या णव थळांनी 4,300 विद्यार्थ्यांची तांक आसा. ह्यो कार्यावळी सकाळीं 9 ते दनपारां 1 वरां मजगतीं जातल्यो. सकाळीं 9.30 ते 11.00 वरां मजगतीं बीज भाशणाच्या वाख्यान्याचे लायव्ह स्ट्रिमींग जाले उपरांत सगल्या थळांनी वेगळ्या वगेळ्या वाख्यांनाक सुरवात जातली अशी म्हायती नरोन्हा हांणी दिली.
जाल्यार हेर णव थळांनी इस्रोचे आदले प्राध्यापषक रंगनाथ नावलगूंड, सीएमसी वेल्लोरचे सहाय्यक प्राध्यापक डॉ. जॉश जोर्जी, बीट्स पिलानीची प्राधाप्यक प्रा. मिनस कौशीक, टुमकूर विद्यापिठाचे कुलपती प्रा. एम. वैकटेशवर्लू, आयआयएसी बंगळुरूचे उपडीन प्रा. दीपिक्षा चक्रवर्ती, एनआयटी कर्नाटकचे आदले प्राध्यापक डॉ. जी. श्रीनिकेतन, सीएसआयर-आयआयसीटीचे प्रधान वैज्ञानीक डॉ. विनीत अनीया, गोंय राज्य उच्च शिक्षण परिशदेचे प्राध्याप डॉ. विठ्ठल तिळवी, सैध्दांतीक विज्ञानाचे अंतरराष्ट्रीय केंद्र बंगळुरूचे प्रा. दिपक धर, कुवेंपू विद्यापीठ कर्नाटकचे प्राध्यापक प्रा. योगेंद्र के, वेन्नर-ग्रॅन विद्यापीठ स्विडनचे डॉ. राकेश तिवारी, कर्नाटक रान उदरगत म्हामंडळाचे वेवस्थापकी संचालक विजय मोहन, ब्रॉवनश्वॅग विद्यापिठाचे रसायन विभाग मुखेली डॉ. रवी फर्नांडीस, आयआयएससी बंगळुरूचे सहाय्यक प्राध्यापक विष्णू महादेव अय्यर, सीएसआयआर राष्ट्रीय बॉटनीकल संसोधन संस्था लखनौचे संचालक डॉ. ए.क. शासानी, टीसीजी क्रेस्ट कोलकाताचे सहाय्यक प्राध्यापक डॉ. किंगशूक रॉय पॅनल चर्चा करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
