भांगरभूंय | प्रतिनिधी
आतां उच्च न्यायालयानूय हणजूणें दुर्घटना प्रकरण आपूण जावन हातांत घेतलां.
इबाडिल्लें सुदारपाचें आसल्यार वायट गजाल घडची पडटा खंय. देखीक, रस्त्यार फोंडकूल पडलां जाल्यार थंय भिरांकूळ अपघात जाले उपरांतूच तें पुरपाचें काम सरकारी यंत्रणां हातांत घेता. हाका बेजापसालदारपण म्हणपाचें काय आळसाय तें दरेकल्यान थारावचें. पूण अशें घडटा खरें. गोंयांत पर्यटन मळाचेर, खास करून दर्यादेगांचेर जें कितें चलता, ताचे आड अक्षरशा दर दिसा कितें ना कितें छापून येता वा सोशल मिडियाचेर ताचे पोस्ट, व्हिडियो येतात. मात कोण लक्ष दिनात. तांकां जाग येवपाक हणजूण्यां सारकी वायट घडणूक घडची पडटा. 25 निश्पाप तरणाट्यांचो जीव घेवपी!! आतां हो ‘अधांतरी कारभार’ जाग्यार घालपाचें काम नेटान चालू जालां. परवाने नाशिल्ल्या दियाज (हणजूण), सीओ2 (वागातोर) ह्या क्लबांक सील ठोकलां. काब द राम वाठारांतल्या दी कॅप गोवा हें हाॅटेलूय कांय दीस बंद दवरपाचो आदेश आयला. गोंयांत पर्यटन मोसम तेंगशेर पावला. हे जोडपाचे दीस. मात आतां ह्या आनी आनीक काय वेवसायिकांक फटको बसपाचो आसा, अशें ही धडक कारवाय पळयल्यार दिसता!
च्यावेक पयशे दिवन कामां करून घेवपाची पद्दत सादारण 1980 च्या दसकांत सुरू जाली. तशी ताचे पयलीं साग्वाद (आंबे, नुस्त्याची गांथण, रानदुकराचें मास…) दिवन कामां करून घेवपाची रीत आशिल्लीच. वळखिनूय कामां जातालीं. मात, उपरांत पयश्यां बगर पान हालना जालें. वेवस्थे वांगडा लोकूय बरगेल्यात. कसलेंच काम करपाक आतां लांच मागपाची गरज ना, ती तुमचे कडेन चलत येता. ‘कितें दिवचें पडटलें?’ अशें कामाक हात घालचे पयलींच विचारतात. अर्थांत भ्रश्टाचार कोण करता, तें सगल्यांक खबर आसा. ‘ढ’ भुरगो पसून ताचेर सोंपेपणी पीएचडी करपाक शकता. आसूं. आयज गोंयांत वेवसायीक बांदकामां वाडत आसात. जमनी सोंपिल्ल्यान दोंगर बोडकावप चालू जालां. कांय जाणांनी तर दोंगरूच विकते घेतल्यात. हणजूण दुर्घटणे उपरांत सरकारान समिती स्थापन करून दर्यादेगां वयल्या वेवसायिकांचे परवाने तपासप सुरू केलां. तीन आस्थापनां सांपडल्यांत. एकल्यान तर शॅकाच्या नांवा खाला हाॅटेल सुरू केल्लें खंय.
‘रोमियो क्लबा’च्या उज्याची चवकशी पुराय जावंक नाशिल्ल्यान दंडाधिकारी समितीक सप्तकाची मुजतवाड दिल्या. घडये ती आनिकूय वाडूं येता. कारण चेंप्यांतल्यान कितें- कितें भायर सरत आसा. चवकशी अजून सोंपूंक ना. खरें म्हणल्यार मुळांत मिठागरांचेर बांदकाम करप बेकायदेशीर. आतां हात घालाच जाल्यार दुबावीत आस्थापनांची चवकशी करून कोणे कायदो माड्डिला तें सोदून काडचें. भितर गोंयकार वेवसायीक कितले, तांणी तो वेवसाय कोणा कडल्यान विकत वा भाड्यान घेतला, परवाने आसात काय नात, तें तपासचें. म्हायती जाहीर करची. सरकारी अधिकारी, कर्मचारी परस्पर वेव्हार करताले काय तांचेर कोणाचें चेपण आशिल्लें, तेंय कळचें. सोशल मिडियाचेर प्रतिक्रियांचो पावस पडला. तातूंत चडश्यांक दोंगर खणून फक्त हुंदीर भायर सरतलो अशें दिसता. तांणी निरशेवणेचो सूर लायला. मात अशें निरशेवन चलचें ना. चुकीक माफी ना, ह्या न्यायान फुडली कारवाय
जावंक जाय.
आतां उच्च न्यायालयानूय हणजूणें दुर्घटणा प्रकरण आपूण जावन हातांत घेतलां. प्रकरणाची पुराय म्हायती दिवपाक अॅड. रोहित ब्राझ डिसा हांची अॅमिकस क्युरी म्हूण नेमणूक केल्या. फुडली सुनावणी येता त्या 8 जानेवारीक जातली. वेवसायीक बांदकामां, तीं कशीं उबीं जाल्यांत, तीं मोडपाक दिल्ली स्थगिती हो विशय आतां न्यायालयांत सुनावणे वेळार रंगतलो. चवकशी समिती, तपास यंत्रणा रुपी जादूगाराच्या चेप्यांतल्यान एक – एक नग भायर सरत आसात. फुडले कांय दिसूय सरतले. हें चेपें बेगीन रिकामी जावन बेकायदेशीर बुन्यादीचेर उबें आशिल्लें, सगलें ना नपयत जावचें, अशेंच सामान्य भौस मागता आसतलो. आमेन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
